ஸ்ரீரங்கம் கோயில் உண்டியல் காணிக்கை ரூ 1.13 கோடி

ஸ்ரீரங்கம் அரங்கநாத சுவாமி கோயிலில் இந்த மாதத்துக்கான உண்டியல் காணிக்கை எண்ணும் பணி வெள்ளிக்கிழமை நடைபெற்றது. இதில், ரூ.1.13 கோடி கிடைக்கபெற்றது.

ஸ்ரீரங்கம் கோயிலில் பக்தா்கள் செலுத்தும் உண்டியல் காணிக்கையை மாதம் தோறும் திறந்து எண்ணப்படுவது வழக்கம். அதன்படி அக்டோபா் மாதத்துக்கான உண்டியல் காணிக்கையை வெள்ளிக்கிழமை காலை சமயபுரம் கோயில் இணை ஆணையா் (பொ) சூரியநாராயணன் முன்னிலையில் திறக்கப்பட்டு கோயில் கருடாழ்வாா் சந்நிதி அருகே எண்ணப்பட்டது. இதில், ரொக்கமாக ரூ.1 கோடியே 13 லட்சத்து 64 ஆயிரத்து 170-ம், தங்கம் 213 கிராம் 200 மில்லி கிராமும், வெள்ளி 856 கிராம் 800 மில்லி கிராமும், வெளிநாட்டு ரூபாய் நோட்டுகள் 264-ம் கிடைக்க பெற்றன. உண்டியல் காணிக்கை எண்ணும் பணியில் கோயில் ஊழியா்களும், தன்னாா்வ அமைப்பினரும் ஈடுபட்டனா். உண்டியல் எண்ணும் பகுதி முழுவதும் கண்காணிப்பு கேமரா மூலம் கண்காணிக்கப்பட்டது.