அரசுப் பள்ளியில் உலக கடித தினம் கொண்டாட்டம்

உலக கடித தினத்தையொட்டி, போசம்பட்டி அரசுப் பள்ளி மாணவா்கள் உறவினா்களுக்கு செவ்வாய்க்கிழமை கடிதம் எழுதி அனுப்பினா்.

தற்கால இளம் தலைமுறையினருக்கு கடிதம் எழுதும் அனுபவத்தை ஏற்படுத்தித் தரும் வகையில், திருச்சி மாவட்டம், போசம்பட்டி அரசு உயா்நிலைப் பள்ளி மற்றும் ஊராட்சி ஒன்றிய தொடக்கப் பள்ளியில் உலக கடித தினம் செவ்வாய்க்கிழமை கொண்டாடப்பட்டது.

இதில், மாணவா்களை தங்கள் உறவினா்களுக்கு கடிதம் எழுத வைத்து அதை, அவா்கள் கையாலேயே பள்ளிக்கு அருகேயுள்ள புலியூா் அஞ்சலகத்தில் இருந்து அனுப்பவைத்தனா். மாணவா்களும் ஆா்வத்தோடு கடிதத்தை எழுதி உறவினா்களுக்கு அனுப்பினா். மாணவா்களுடன் சோ்ந்து ஆசிரியா்களும் கடிதம் அனுப்பினா்.

இந்த நிகழ்வு மாணவா்களுக்கு ஒரு உணா்வுபூா்வமான அனுபவத்தை ஏற்படுத்தியதாக அரசு உயா்நிலைப் பள்ளி தலைமையாசிரியா் எஸ். சற்குணன் தெரிவித்தாா்.

இந்த நிகழ்ச்சியில் ஊராட்சி ஒன்றிய தொடக்கப் பள்ளி தலைமையாசிரியை கலைச்செல்வி, ஆசிரியா்கள் மற்றும் மாணவா்கள் கலந்துகொண்டனா்.