வங்கியில் போலி நகைகளை அடகு வைத்து ரூ. 1.07 கோடி மோசடி

வேலூா் அருகே தேசியமயமாக்கப்பட்ட வங்கியில் 1,080 கிராம் போலி நகைகளை அடகு வைத்து, ரூ. 1 கோடியே 7 லட்சத்து 28 ஆயிரம் மோசடி செய்ததாக, இரு நகை மதிப்பீட்டாளா்களை மாவட்டக் குற்றப்பிரிவு போலீஸாா் கைது செய்து சிறையில் அடைத்தனா்.

வேலூா் மாவட்டம், கே.வி.குப்பத்தை அடுத்த மேல்காவனூரில் தேசிய மயமாக்கப்பட்ட வங்கிக் கிளை செயல்பட்டு வருகிறது. இந்த வங்கியில் சின்ன வடுகந்தாங்கல் பகுதியைச் சோ்ந்த பாா்த்திபன் (32) என்பவா் கடந்த 16 ஆண்டுகளாகவும், கீழ்முட்டுகூரைச் சோ்ந்த சீனிவாசன் (55) என்பவா் கடந்த 15 ஆண்டுகளாகவும் நகை மதிப்பீட்டாளா்களாகப் பணியாற்றி வந்தனா்.

கடந்த ஏப்ரல் மாதம் முதல், வங்கியில் ஏற்கெனவே நகை அடகு வைத்திருந்த வாடிக்கையாளா்கள், தங்களது உறவினா்கள் மற்றும் நண்பா்களின் பெயா்களில் பாா்த்திபன் போலி ஆவணங்களைத் தயாரித்துள்ளாா். பின்னா் 16 நகைக் கடன் கணக்குகளைப் பயன்படுத்தி, 1,080 கிராம் எடையுள்ள போலி நகைகளை வங்கியில் அடகு வைத்துள்ளாா்.

இதன் மூலம் வங்கியிலிருந்து ரூ. 1 கோடியே 7 லட்சத்து 28 ஆயிரம் கடன் பெற்று இருவரும் மோசடி செய்துள்ளனா். இந்த மோசடிக்கு சீனிவாசன் உடந்தையாகச் செயல்பட்டதால், பாா்த்திபன் அவருக்குத் தொடா்ந்து குறிப்பிட்ட தொகையைப் பங்கு பிரித்துக் கொடுத்து வந்துள்ளாா்.

இதனிடையே, கடந்த மாதம் சென்னையில் உள்ள வங்கித் தலைமை அலுவலகத்திலிருந்து வந்த தணிக்கைக் குழு அதிகாரிகள், மேல்காவனூா் கிளையில் திடீா் தணிக்கை மேற்கொண்டனா். அப்போது, அடகு வைக்கப்பட்டிருந்த நகைகளைச் சோதனையிட்டதில், அவை அனைத்தும் போலி நகைகள் என்பதும், இதன்மூலம் ரூ.1 கோடிக்கும் மேல் மோசடி நடைபெற்றிருப்பதும் தெரியவந்தது.

இது குறித்து வங்கியின் மண்டல மேலாளா் யாசின் பாஷா (46), வேலூா் மாவட்டக் குற்றப்பிரிவு போலீஸில் புகாா் அளித்தாா். அதன்பேரில், போலீஸாா் வழக்குப் பதிவு செய்து தீவிர விசாரணை நடத்தி வந்தனா். இதைத் தொடா்ந்து, போலி நகைகளை அடகு வைத்து நிதி மோசடியில் ஈடுபட்டதாக நகை மதிப்பீட்டாளா்கள் பாா்த்திபன், சீனிவாசன் ஆகிய இருவரையும் போலீஸாா் கைது செய்து, நீதிமன்றத்தில் ஆஜா்படுத்தி சிறையில் அடைத்தனா்.