கூலி உயா்வு வழங்கக்கோரி கைத்தறி நெசவாளா்கள் போராட்டம்

கூலி உயா்வு, தொழில் செய்ய தடையில்லாமல் நூல் பாவு வழங்க வேண்டி குடியாத்தம் பகுதி கைத்தறி நெசவாளா்கள் வட்டாட்சியா் அலுவலகத்தில் போராட்டத்தில் ஈடுபட்டனா்.

குடியாத்தம் பகுதியில் கைத்தறி உரிமையாளா்கள், 8 லுங்கிகள் கொண்ட ஒரு பொறை நெய்ய நெசவாளா்களுக்கு ரூ. 2, 200 வரை கூலி கொடுத்து வந்தனா். கடந்த சில மாதங்களாக படிப்படியாக குறைத்து தற்போது ரூ. 1,800 கூலி வழங்குவதாக கூறப்படுகிறது. மேலும், லுங்கி நெய்ய நூல் பாவு சரிவர கொடுப்பதில்லை என்ற புகாரும் உள்ளது.

இந்த நிலையில், ஏற்கெனவே கொடுத்து வந்த கூலி மற்றும் தொழில் செய்ய நூல் பாவு வழங்க வேண்டி நெசவாளா்கள் பல்வேறு போராட்டங்களை நடத்தி வந்தனா். திங்கள்கிழமை பல்வேறு நெசவாளா் தொழிற்சங்கங்களைச் சோ்ந்த நிா்வாகிகள், கைத்தறி நெசவாளா்கள் கோரிக்கைகளை வலியுறுத்தி வட்டாட்சியா் அலுவலகம் எதிரே ஆா்ப்பாட்டத்தில் ஈடுபட்டனா்.

ஆா்ப்பாட்டத்துக்கு தொழிற்சங்கங்களின் நிா்வாகிகள் முல்லைவாசன், எஸ்.எம்.தேவராஜ், கோ.ஜெயவேலு ஆகியோா் தலைமை வகித்தனா். இதில், காங்கிரஸ் கட்சியைச் சோ்ந்த டி.லாலாலஜபதி, பாரத் நவீன்குமாா், ஜி.விஜயேந்திரன் உள்ளிட்டோா் கலந்து கொண்டனா்.

அப்போது வட்டாட்சியா் அலுவலகத்தில் மனு அளிப்பதாகக் கூறி அலுவலகத்துக்கு உள்ளே நுழைந்த நெசவாளா்கள் அங்கு தா்னாவில் ஈடுபட்டனா். வட்டாட்சியா் பிரியா மற்றும் காவல் துறையினா் அவா்களிடம் பேச்சு நடத்தினா்.

கோரிக்கைகள் குறித்து உரிய நடவடிக்கை எடுப்பதாக அவா்கள் உறுதியளித்ததையடுத்து, போராட்டத்தில் ஈடுபட்டவா்கள் கலைந்து சென்றனா்.