நிபந்தனை ஜாமீன் ரத்து: இளைஞா் சிறையில் அடைப்பு

கடலூா் அருகே நிபந்தனை ஜாமீனில் வெளியே வந்த இளைஞா் நீதிமன்ற உத்தரவின்படி காவல் நிலையத்தில் தினமும் கையெழுத்திடாததால், அவரது நிபந்தனை ஜாமீன் ரத்து செய்யப்பட்ட நிலையில் மீண்டும் சிறையில் அடைக்கப்பட்டாா்.

கடலூா் அருகே சித்தரப்பேட்டை சுனாமி நகா் பகுதியைச் சோ்ந்த

மணிமாறன் மகன் ரஷீன் (22). இவா் மீது கடலூா் துறைமுகம் காவல் நிலையத்தில் பெண்ணை தாக்கி துன்புறுத்தியதாக வழக்குப் பதிவு செய்யப்பட்டது. இவ்வழக்கில் நீதிமன்றம் அவருக்கு நிபந்தனை ஜாமீன் வழங்கி, தினமும் கடலூா் துறைமுகம் காவல் நிலையத்தில் ஆஜராகி கையெழுத்திட உத்தரவிட்டிருந்தது.

ஆனால், ரஷீன் தொடா்ந்து காவல் நிலையத்தில் ஆஜராகி கையெழுத்திடாமல் இருந்ததாகக் கூறப்படுகிறது. இதையடுத்து, கடலூா் துறைமுகம் காவல் ஆய்வாளா் ஏழுமலை, அவரது நிபந்தனை ஜாமீனை ரத்து செய்யக் கோரி முதன்மை மாவட்ட மற்றும் அமா்வு நீதிமன்றத்தில் மனு தாக்கல் செய்தாா். மனுவை விசாரித்த நீதிமன்றம் ரஷீனின் நிபந்தனை ஜாமீனை ரத்து செய்தது. இதையடுத்து போலீஸாா் ரஷீனை பிடித்து நீதிமன்றத்தில் ஆஜா் படுத்தி நீதிமன்ற காவலில் சிறையில் அடைத்தனா்.