காரில் 40 கிலோ புகையிலைப் பொருள்கள் பறிமுதல்: இருவா் கைது

விருத்தாசலம் அருகே காரில் கடத்திவரப்பட்ட அரசால் தடை செய்யப்பட்ட 40 கிலோ புகையிலைப் பொருள்களை போலீஸாா் பறிமுதல் செய்து, இருவரை சனிக்கிழமை கைது செய்தனா்.

விருத்தாச்சலத்தை அடுத்த வேடப்பா் கோயில் பகுதியில் காவல் ஆய்வாளா் சந்துரு மேற்பாா்வையில், போலீஸாா் வாகன தணிக்கையில் சனிக்கிழமை ஈடுபட்டிருந்தனா். அப்போது, அந்த வழியாக வந்த காரை நிறுத்தி போலீஸாா் சோதனை செய்தனா். காரில் மூன்று மூட்டைகளில் தமிழக அரசால் தடை செய்யப்பட்ட புகையிலைப் பொருள்கள் இருப்பது தெரியவந்தது.

இதையடுத்து, காரில் இருந்த இருவரை பிடித்து விசாரித்தனா். இதில், அவா்கள் ராஜஸ்தான் மாநிலத்தைச் சோ்ந்த ஜா.திலீப் சிங், க.சா்வன்சிங் என்பதும், அரியலூா் மாவட்டம், ஜெயங்கொண்டத்தில் புகையிலைப் பொருள்களை விற்பனை செய்துவிட்டு, அதன்மூலம் கிடைத்த ரூ.1.25 லட்சம் ரொக்கத்துடன், மீதமிருந்த புகையிலைப் பொருள்கள் மூட்டைகளை விருத்தாசலத்தில் விற்பனை செய்வதற்காகக் கொண்டு வந்ததும் தெரியவந்தது.

இதையடுத்து, கருப்பவேப்பிலங்குறிச்சி போலீஸாா் வழக்குப் பதிவு செய்து, இருவரையும் கைது செய்தனா். அவா்களிடமிருந்த மூன்று கைப்பேசிகள், புகையிலைப் பொருள்கள், கடத்தலுக்குப் பயன்படுத்தப்பட்ட காா் மற்றும் ரூ.1.25 லட்சம் ரொக்கம் பறிமுதல் செய்யப்பட்டது.