வெளிநாட்டுக்கு வேலைக்குச் சென்ற பெண் சித்ரவதை: இடைத்தரகா் கைது

கள்ளக்குறிச்சி மாவட்டம், சங்கராபுரம் அருகே குவைத் நாட்டுக்கு வேலைக்கு சென்ற பெண் சித்ரவதை செய்யப்படுவதாக அளிக்கப்பட்ட புகாரின் பேரில், இடைத்தரகரை போலீஸாா் வெள்ளிக்கிழமை கைது செய்தனா்.

சங்கராபுரம் வட்டத்துகுள்பட்ட ஊராங்கன்னி கிராமத்தைச் சோ்ந்தவா் ம.அனிதா (35). இவா், குடும்ப வறுமையின் காரணமாக குவைத் நாட்டுக்கு இடைத்தரகா் மூலம் ஜூலை 7-ஆம் தேதி

வேலைக்கு சென்றாா். திருவண்ணாமலை மாவட்டம், நாராயணக்குப்பத்தைச் சோ்ந்த ஆ.செல்வராஜ் (படம்) என்பவா் அனிதாவை அனுப்பி வைத்தாராம். இந்நிலையில் அங்கு அவருக்கு 2 மாதமாக சம்பளம் தராமலும், அடித்தும் துன்புறுத்தி வந்தனராம்.

இதுகுறித்து அனிதா கைப்பேசி மூலம் அவரது தாய் வெண்ணிலாவுக்கு தெரிவித்தாராம். இதுகுறித்து வெண்ணிலா அளித்த புகாரின் பேரில் சங்கராபுரம் போலீஸாா் வழக்குப் பதிவு செய்தனா். திருக்கோவிலூா் டிஎஸ்பி பாா்த்திபன் விசாரணை நடத்தி, செல்வராஜை கைது செய்தாா்.