செல்லிடப்பேசி கடையில் திருட்டு: இளைஞர்கள் 2 பேர் கைது

புதுவை அருகே செல்லிடப்பேசி கடையில் திருடிய 2 இளைஞர்களை போலீஸார் வெள்ளிக்கிழமை கைது செய்தனர்.

புதுவை லாஸ்பேட்டை தாகூர் நகரைச் சேர்ந்தவர் சிவக்குமார் (26). இவர், அரியாங்குப்பம், வீராம்பட்டினம் சாலையில் செல்லிடப்பேசி கடை வைத்துள்ளார். இவர் புதன்கிழமை இரவு வழக்கம்போல் கடையை மூடி விட்டு வீட்டிற்கு சென்று விட்டார்.

நள்ளிரவு வந்த மர்ம நபர்கள், கடையின் ஷட்டரை உடைத்து கடையிருந்த 50-க்கும் மேற்பட்ட செல்லிடப்பேசிகள், ரூ.4 ஆயிரம் ரொக்கம் மற்றும் உதிரிப் பாகங்களைத் திருடிச் சென்றுள்ளனர்.

சிவக்குமார் வியாழக்கிழமை காலை கடையை திறக்கச் சென்றபோது கடையில் திருட்டுப் போனது தெரிய வந்தது.

இது குறித்த புகாரின் பேரில் அரியாங்குப்பம் போலீஸார் வழக்குப் பதிவு செய்து, தடயவியல் நிபுணர்களுடன் சென்று ஆய்வு செய்தனர். மேலும், தனிப்படை அமைத்தும் விசாரணை நடத்தினர்.

இந்நிலையில், வியாழக்கிழமை இரவு அரியாங்குப்பம் போலீஸார், கடலூர் மெயின் ரோடில் வாகனச் சோதனையில் ஈடுபட்ட போது,  சந்தேகத்துக்குகிடமான வகையில் அங்கு சுற்றித்திரிந்த இரண்டு இளைஞர்களைப் பிடித்து விசாரித்தனர்.

அவர்கள், சென்னை அயோத்திக்குப்பம் பகுதியைச் சேர்ந்த மணிகண்டன் (22), கார்த்திக் (24) என்பதும், அரியாங்குப்பம் செல்லிடப்பேசி கடையில் திருடியதும் தெரிய வந்தது.

இதனையடுத்து, இருவரையும் வெள்ளிக்கிழமை கைது செய்த அரியாங்குப்பம் போலீஸார், அவர்களை புதுவை நீதிமன்றத்தில் ஆஜர்படுத்தி, காலாப்பட்டு சிறையில் அடைத்தனர்.

அவர்களிடமிருந்து ரூ.50 ஆயிரம் மதிப்பிலான செல்லிடப்பேசிகளையும், ரூ.4 ஆயிரம் ரொக்கத்தையும் போலீஸார் பறிமுதல் செய்தனர்.