முத்தரப்புக் கூட்டத்தைக் கூட்ட சுமைதூக்கும் தொழிலாளர்கள் வலியுறுத்தல்

புதுவையில் ஏ.ஐ.டி.யு.சி. சுமை தூக்குவோர் நலச் சங்கத்தின் மாநில பேரவைக் கூட்டம் வினோபா நகர் சமுதாய நலக் கூடத்தில் வெள்ளிக்கிழமை நடைபெற்றது.

கூட்டத்தில் ஏ.ஐ.டி.யு.சி. மாநில சிறப்புத் தலைவர் ஆர்.விஸ்வநாதன் கொடியேற்றி வைத்தார். சுமை தூக்குவோர் சங்க மாநிலச் செயலர் தயாளன் வரவேற்றார். ஏ.ஐ.டி.யு.சி. மாநிலத் தலைவர் நாரா கலைநாதன் தொடக்கி வைத்துப் பேசினார். மாநிலச் செயலர் வி.எஸ்.அபிஷேகம், துணைப் பொதுச் செயலர் தினேஷ்பொன்னையா, மாநிலச் செயலர் சேதுசெல்வம், இந்திய கம்யூனிஸ்ட் தொகுதி செயலர் பி.முருகன், நளவேந்தன் உள்ளிட்டோர் பேசினர்.

சுமைதூக்கும் தொழிலாளர் பிரச்னையில் காவல் துறையினரின் தலையீடு உள்ளதால், தொழிலாளர், உரிமையாளர் இடையே பாதிப்பு ஏற்படுகிறது.

இதனைப் போக்க சுமைதூக்கும் தொழிலாளர், வர்த்தகர்கள், காவல் துறையினரைக் கொண்டு முத்தரப்புக் கூட்டத்தை கூட்ட தொழிலாளர் துறை ஏற்பாடு செய்ய வேண்டும். கடை மற்றும் நிறுவனங்களில் உரிமையாளர்களால் பணியமர்த்தப்பட்டுள்ள சுமை தூக்கும் தொழிலாளர் பட்டியலை பதிவு செய்து வெளியிட வேண்டும் என்றும் கூட்டத்தின் மூலம் அரசை வலியுறுத்தியுள்ளனர்.