மாணவா்கள் மீதான தாக்குதலுக்கு பிரதமா் மோடி பொறுப்பேற்க வேண்டும்: காங்கிரஸ் வலியுறுத்தல்

மாணவா்கள் மீதான தாக்குதலுக்குப் பிரதமா் நரேந்திர மோடி பொறுப்பேற்க வேண்டும் என்று காங்கிரஸ் கட்சியின் தேசிய இணைச் செயலா் பாலக் வா்மா கூறினாா்.

நீட் தோ்வை ரத்து செய்யக் கோரியும், மத்திய கல்வியமைச்சா் தா்மேந்திர பிரதானை பதவி நீக்கம் செய்யக் கோரியும் ராகுல் காந்தி கைது கண்டித்தும் புதுச்சேரியில் காங்கிரஸாா் வியாழக்கிழமை ஆா்ப்பாட்டத்தில் ஈடுபட்டனா்.

இதில் கலந்து கொண்ட பின்னா் அவா் செய்தியாளா்களிடம் கூறியது: நீட் தோ்வு பாதிப்பால் மாணவா்கள் பலா் உயிரிழந்துள்ளனா். தங்கள் உரிமைக்காக இளைஞா்கள் போராடுகின்றனா். அவா்கள் தீவிரவாதிகள் அல்ல. மாணவா்கள் மீதான தாக்குதலுக்குப் பிரதமா் பொறுப்பு ஏற்க வேண்டும் என்றாா்.

அப்போது முன்னாள் முதல்வா் வே. நாராயணசாமி கூறுகையில், ‘அன்னா ஹசாரேவை காங்கிரஸ் ஆட்சியில் தூண்டி விட்டது பாஜகதான். நீட் தோ்வுக்கு எதிராக காங்கிரஸ் ஏற்கெனவே போராடி வருகிறது. காங்கிரஸ் ஆட்சியில் தவறு நடந்தபோது அமைச்சா்கள் ராஜிநாமா செய்துள்ளனா். பாஜக ஆட்சியில் அதுபோல் இல்லை என்றாா்.

காங்கிரஸாா் ஆா்ப்பாட்டம்: புதுச்சேரி இந்திரா காந்தி சிலை அருகே நடைபெற்ற ஆா்ப்பாட்டத்துக்கு மாணவா் காங்கிரஸ் மாநில தலைவா் ஹா்சவா்தன் தலைமை வகித்தாா்.

ஆா்ப்பாட்டத்தில் அகில இந்திய காங்கிரஸ் இணை செயலா் பாலக் வா்மா, முன்னாள் எம்எல்ஏ சிவசங்கா், இளைஞா் காங்கிரஸ் தலைவா் ஆனந்தபாபு நடராஜன், மகளிா் காங்கிரஸ் தலைவி நிஷா, மாணவா் காங்கிரஸ் நிா்வாகிகள் பங்கேற்றனா்.

இதேபோல வழக்குரைஞா் லெனின்துரை தலைமையில் புதுச்சேரி நீதிமன்ற வாயிலில் மாணவா்களின் போராட்டத்துக்கு ஆதரவாக வழக்குரைஞா்கள் வியாழக்கிழமை ஆா்ப்பாட்டம் நடத்தினா்.