தட்டாஞ்சாவடியில் களைகட்டுகிறது இடைத்தோ்தல் பிரசாரம்: வேட்பாளா்கள், அரசியல் கட்சி தலைவா்கள் தீவிர வாக்கு சேகரிப்பு

புதுச்சேரி யூனியன் பிரதேசத்துக்குள்பட்ட தட்டாஞ்சாவடி இடைத்தோ்தல் பிரசாரம் களைகட்டியுள்ளது. ஆளும் என்.ஆா்.காங்கிரஸ், திமுக, காங்கிரஸ், பாஜக, கம்யூனிஸ்ட் உள்ளிட்ட கட்சிகளின் வேட்பாளா்கள், தலைவா்கள் வீதி வீதியாக சென்று வாக்கு சேகரித்தனா்.

தட்டாஞ்சாவடி தொகுதி இடைத்தோ்தல் அக்.6-ஆம் தேதி நடைபெற உள்ள நிலையில் இந்த தோ்தலுக்கான பிரசாரமும் தீவிரமடைந்துள்ளது. புதுச்சேரி தட்டாஞ்சாவடி தொகுதி இடைத்தோ்தலில் போட்டியிடும் என்.ஆா்.காங்கிரஸ் வேட்பாளா் அசோக் ஆனந்த் முத்துலிங்கம்பேட்டை பகுதியில் புதன்கிழமை வீடு வீடாகச் சென்று வாக்குச் சேகரித்தாா். அவருக்கு ஆதரவாக என்.ஆா். காங்கிரஸ் மூத்த நிா்வாகி புவனா என்ற புவனேஸ்வரன் சென்று வாக்குச் சேகரித்தாா். அந்த பகுதி மக்கள் வேட்பாளா் அசோக் ஆனந்துக்கு ஆரத்தி எடுத்தும் மலா் தூவியும் வரவேற்றனா்.

இந்நிலையில், இடைத்தோ்தல் பிரசாரத்திற்காக,அமைச்சா்கள், எம்எல்ஏக்கள், முன்னாள் அமைச்சா்கள், முன்னாள் எம்எல்ஏக்களை என்.ஆா்.காங்கிரஸ் கட்சி களமிறக்குகிறது. இதுகுறித்து, கட்சியில் பொதுச்செயலா் என்.எஸ்.ஜெ. ஜெயபால் என்கிற ஐய்யனாா் புதன்கிழமை வெளியிட்ட அறிக்கை

தட்டாஞ்சாவடி தொகுதியில் வாா்டு பொறுப்பாளா்களாக அமைச்சா்கள் வி.பி. சிவக்கொழுந்து, பெ.ராஜவேலு, முன்னாள் அமைச்சா்கள் க.லட்சுமிநாராயணன், டி. தியாகராஜன், என்.ஜி. பன்னீா்செல்வம், எம்எல்ஏக்கள் ரவிக்குமாா், அழகு என்கிற அழகானந்தம், ஏ.கே.டி. ஆறுமுகம், வையாபுரி மணிகண்டன், ஐயப்பன், மோகன்தாஸ், நாராயணசாமி, முன்னாள் எம்எல்ஏக்கள் ஆா்.பாஸ்கா், தமிழ்ச்செல்வன் உள்ளிட்டோா் நியமிக்கப்பட்டுள்ளனா் என்று தெரிவித்துள்ளாா்.

திமுக பிரசாரம்:

திமுக வேட்பாளா் கு.சேதுசெல்வத்தை ஆதரித்து தட்டாஞ்சாவடி தொகுதிக்குள்பட்ட புதுப்பேட்டை பகுதியில் திமுக தோ்தல் பொறுப்பாளா் ஜெகத்ரட்சகன் எம்பி, துணை பொதுச் செயலா் பொன்முடி, புதுச்சேரி மாநில அமைப்பாளா் ஆா்.சிவா ஆகியோா் தலைமையில் திமுக மற்றும் கூட்டணி கட்சி நிா்வாகிகள் புதன்கிழமை வாக்குச் சேகரித்தனா்.

அப்போது செய்தியாளா்களிடம் பேசிய ஜெகத்ரட்சன் கூறியது:

தட்டாஞ்சாவடி தொகுதியில் சாலை வசதி, கழிவுநீா் கால்வாய், குடிநீா் உள்ளிட்ட அடிப்படை வசதிகள் முறையாக இல்லை. சிறு மழை பெய்தால்கூட பல்வேறு பகுதிகளில் மழைநீா் தேங்கி நிற்கிறது. புதுச்சேரியில் தற்போது சட்டம் ஒழுங்கு சரியில்லை. புதுச்சேரியின் வளா்ச்சிக்கு மாநில அந்தஸ்து மிகவும் அவசியம். புதுச்சேரிக்கு தனி மாநில அந்தஸ்து வழங்க வேண்டும் என்பதை வலியுறுத்தி நாங்கள் நீதிமன்றத்தை அணுகியிருக்கிறோம். நீதிமன்றம் மூலம் புதுச்சேரிக்கு தனி மாநில அந்தஸ்து பெற்றுத் தருவோம். நாடாளுமன்றத்திலும் புதுச்சேரிக்கு மாநில அந்தஸ்து வழங்க வேண்டும் என தொடா்ந்து குரல் கொடுப்போம் என்றாா் ஜெகத்ரட்சகன்.

பாஜக குற்றச்சாட்டு:

இதற்கிடையே புதுச்சேரியில் காங்கிரஸ் கட்சியை மக்கள் புறந்தள்ளியுள்ளனா் என்று புதுச்சேரி இம்மாநில தலைவா் வி.பி. ராமலிங்கம் கூறினாா்.இது குறித்து கட்சியின் தலைமை அலுவலகத்தில் அவா் செய்தியாளா்களிடம் புதன்கிழமை கூறியதாவது:

தட்டாஞ்சாவடி தொகுதியில் எங்கள் கட்சி சாா்பில் பாஜக கடுமையாக உழைத்து 10 ஆயிரம் வாக்கு வித்தியாசத்தில் தேசிய ஜனநாயக கூட்டணி வேட்பாளா் அசோக் ஆனந்தை வெற்றி பெற செய்வோம். தோ்தல் பிரசாரத்துக்கு முக்கிய தலைவா்கள் வருவது குறித்து இன்னும் முடிவாகவில்லை. ராகுல் காந்தி தலைமையில் 100-வது தோல்வியை நோக்கி காங்கிரஸ் கட்சி சென்று கொண்டிருக்கிறது. அதனால் காங்கிரஸின் படம் இப்போது எடுபடாது. ஆகவே ஜோசப் விஜய்யைத் தூக்கிப்பிடித்தால் தான் காங்கிரஸ் கதை களத்தில் ஓடும். அதனால்தான் அவரின் படத்தைப் போட்டு பிரசாரம் செய்கிறாா்கள்.

காங்கிரஸ் கட்சி புதுச்சேரியில் கடந்த முறை இரண்டு தொகுதிகளிலும், இம்முறை ஒரு தொகுதியிலும் வெற்றி பெற்றுள்ளது. முதல்வா் ரங்கசாமி சொன்னதுபோல் எதிா்காலத்தில் காங்கிரஸ் கட்சியே இருக்காது. காங்கிரஸ் கட்சியை புதுச்சேரி மக்கள் புறந்தள்ளியுள்ளனா் என்றாா் ராமலிங்கம்.

நேரு குற்றச்சாட்டு:

இதற்கிடையே, தட்டாஞ்சாவடியில் பொய் வாக்குறுதிகளை அள்ளி வீசுவதாக என்.ஆா். காங்கிரஸ் மீது நேயம் மக்கள் கழகத் தலைவா் ஜி.நேரு எம்எல்ஏ கூறினாா்.தட்டாஞ்சாவடி தொகுதி இடைத்தோ்தலில் காங்கிரஸ் வேட்பாளராக விநாயகத்தை ஆதரித்து பிரசாரம் செய்த அவா் இவ்வாறு கூறினாா். அவா் மேலும் கூறியதாவது: மக்களுக்குத் தேவையான அடிப்படை வசதிகளையும் மக்களுக்கு வேண்டிய அத்தியாவசிய பணிகளும் மேற்கொள்ளாமல் தற்போது தோ்தல் வருகிறது என்றவுடன் வந்து பல்வேறு பொய் பிரசாரங்கள், பொய் வாக்குறுதிகளை அள்ளி வீசி வருகிறாா்கள். கடந்த காலங்களில் இவா்கள்தான் இங்கு எம்எல்ஏவாகவும் ஆட்சியாளா்களாகவும் இருந்தாா்கள் என்றாா் ஜி.நேரு .