சர்க்கரை ஆலைக் கரித்துகளால் அவதி: பொதுமக்கள் புகார்

திருக்கோவிலூர் அருகே கூட்டுறவு சர்க்கரை ஆலையிலிருந்து கரித்துகள்கள் அதிகளவில் வெளியேறுவதால் அவதிப்படுவதாக பொதுமக்கள் தெரிவிக்கின்றனர்.

மூங்கில்துறைப்பட்டில் கூட்டுறவு சர்க்கரை ஆலை செயல்பட்டு வருகிறது. இங்கிருந்து கரித்துகள்கள் அதிகளவில் வெளியேறுவதால் அண்ணாநகர், காமராஜர் நகர், மோகன் நகர், அங்காளம்மன் நகர், தேவி நகர், அம்பேத்கர் நகர், மோட்டூர், காட்டுக்கொட்டகை, பழையூர் பகுதி மக்கள் சிரமத்துக்குள்ளாகின்றனர்.

கரித்துகள்கள் காற்றில் பரவி சுவாசக் கோளாறுகள் ஏற்படுவதாகவும், குடிநீரில் படிவதால் தண்ணீரை கூட திருப்தியாக பருக முடியாமல் அவதிப்படுவதாகத் தெரிவிக்கின்றனர்.

வாகன ஓட்டிகளின் கண்களிலும் கரித்துகள்கள் விழுவதால் விபத்து சூழல் ஏற்படுகிறது.

இது குறித்து இப்பகுதி மக்கள் ஆலை நிர்வாகத்திடம் பலமுறை முறையிட்டும்  பயனில்லை எனக் கூறப்படுகிறது. எனவே, மாசுக் கட்டுப்பாட்டு அதிகாரிகளும், மாவட்ட நிர்வாகமும் தலையிட்டு உரிய நடவடிக்கை எடுக்க வேண்டும் என்பதே இப்பகுதி மக்களின் எதிர்பார்ப்பு.