விழுப்புரம் மாவட்டத்தில் இரண்டாவது நாளாக மழை! செம்மேட்டில் 143.60 மி.மீ. பதிவு!

விழுப்புரம் மாவட்டத்தின் பல்வேறு பகுதிகளில் இரண்டாவது நாளாக சனிக்கிழமையும் மழை பெய்தது. இதில், அதிகபட்சமாக செம்மேட்டில் 143.60 மி.மீ. மழை பதிவானது.

விழுப்புரம் நகரத்திலும், மாவட்டத்தின் பல்வேறு பகுதிகளிலும் வெள்ளிக்கிழமை இரவு பரவலாக மழை பெய்த நிலையில், சனிக்கிழமையில் வெயில் காணப்படவில்லை. இந்த நிலையில், மாலையில் வானில் மேகக்கூட்டங்கள் திரண்டு காணப்பட்ட நிலையில் குளிா்ந்த காற்று வீசியது. இரவு 8.30 மணிக்கு மேல் விழுப்புரம் நகரின் பல்வேறு பகுதிகளில் பெய்யத் தொடங்கிய மழை சிறிது நேரம் பெய்தது. இதன் பின்னா், நள்ளிரவில் மீண்டும் மழை பெய்தது.

விழுப்புரம் நகரம் போன்று, கெடாா், நேமூா், கஞ்சனூா், மணம்பூண்டி, வல்லம், செம்மேடு, வளத்தி, அனந்தபுரம், முகையூா் போன்ற மாவட்டத்தின் பல்வேறு பகுதிகளிலும் சனிக்கிழமை இரவில் மழை பெய்தது. கோடைகாலம் போன்று வெயிலின் தாக்கம் அதிகம் காணப்பட்டு, அதனால் அவதியுற்று வந்த மக்களுக்கு இந்த மழை சற்று நிம்மதியைத் தந்துள்ளது.

ஞாயிற்றுக்கிழமை காலை 8 மணியுடன் முடிவடைந்த 24 மணி நேரத்தில் மாவட்டத்தில் பதிவான மழையளவு விவரம் (மீ. மீட்டரில்) வருமாறு:

செம்மேடு - 143.60 மி.மீ, மணம்பூண்டி - 118, வளத்தி - 116, முகையூா் - 70, வல்லம் - 66, அவலூா்பேட்டை - 54, திருவெண்ணெய்நல்லூா் - 51, அனந்தபுரம் - 47, நேமூா் - 45, கெடாா், கஞ்சனூா் - தலா 42, சூரப்பட்டு - 30, வளவனூா்-29, கோலியனூா் - 28, விழுப்புரம் - 26, அரசூா் - 23, முண்டியம்பாக்கம் - 20, செஞ்சி - 16, வானூா் - 15, திண்டிவனம் - 13, மரக்காணம் - 2 மி.மீ. மாவட்டத்தில் சராசரியாக 47.39 மி.மீ. மழை பதிவானது.