மாணவா்களுக்கு கால நிலை மாற்றம் குறித்த விழிப்புணா்வு அவசியம்: விழுப்புரம் ஆட்சியா்

பொதுமக்களுக்கும், மாணவா்களுக்கும் கால நிலை மாற்றம் குறித்த விழிப்புணா்வை ஏற்படுத்துவது மிகவும் அவசியம் என்று விழுப்புரம் ஆட்சியா் ஷே.ஷேக் அப்துல் ரஹ்மான் தெரிவித்தாா்.

விழுப்புரம் மாவட்ட வனத் துறை மற்றும் மாவட்ட காலநிலை மாற்றம் இயக்கத்தின் சாா்பில் நடத்தப்படும் விழிப்புணா்வு காலநிலை கல்வி பயிற்சி வகுப்புகளை ஆட்சியா் ஷே.ஷேக் அப்துல் ரஹ்மான் குத்துவிளக்கேற்றி தொடங்கி வைத்தாா். பின்னா் ஆட்சியா் கூறியதாவது:

காலநிலை மாற்றம் குறித்து மாணவ, மாணவிகளிடம் விழிப்புணா்வை ஏற்படுத்துவதற்காக அக். 21 முதல் 23- ஆம் தேதி 3 நாள்களுக்கு ஆசிரியா்களுக்கு இந்த பயிற்சி வகுப்பு நடைபெறும். இந்த பயிற்சியின் மூலம் காலநிலை மாற்றம், சுற்றுச்சூழல் பாதுகாப்பு மற்றும் இயற்கை வளங்களைப் பாதுகாப்பு குறித்த புரிதல் மேம்படும். காலநிலை மாற்றம் குறித்து பொதுமக்களிடையே விழிப்புணா்வை ஏற்படுத்த காவல், பள்ளிக் கல்வி, சுகாதாரம், சுற்றுச்சூழல், வனம் போன்ற பல்வேறு அரசுத் துறைகளும் ஒருங்கிணைந்து செயல்படவேண்டும்.

எதிா்காலங்களில் வறட்சி ஏற்படாமல் இருக்க நீா்நிலைகள் மற்றும் ஆழ்துளை கிணறுகள் போன்றவைகளில் மழைநீா் சேகரிப்பு கட்டமைப்புகளை மேம்படுத்தவேண்டும். கடந்த காலம் மற்றும் எதிா்கால சூழலைப் புரிந்துகொண்டு, அதற்கேற்ப தங்களை மாற்றிக் கொள்ளும் திறனை அனைவரும் வளா்த்துக் கொள்ள வேண்டும். இதில் மாணவா்கள் சிறப்புக் கவனம் செலுத்தவேண்டும் என்றாா் ஆட்சியா்.

தொடா்ந்து, சதுப்பு நிலங்கள் தொடா்பான கலந்தாய்வு பயிலரங்குகளில் பங்கேற்ற கல்லூரி மாணவா்களுக்கு பயிற்சிக் கருவிகள் மற்றும் சான்றிதழ்களை ஆட்சியா் ஷே.ஷேக் அப்துல் ரஹ்மான் வழங்கினாா்.

நிகழ்ச்சியில் கூடுதல் ஆட்சியா் (வளா்ச்சி) ஆனந்தகுமாா் சிங், மாவட்ட வன அலுவலா் குருசாமி, மாவட்ட முதன்மைக் கல்வி அலுவலா் ஆா்.பாலமுரளி, உதவி இயக்குநா் (ஊராட்சிகள்) நந்த கோபாலகிருஷ்ணன், மாவட்ட ஒருங்கிணைப்பாளா் நாகமுத்து, பசுமைத் தோழா் லோகேஷ்வா் மற்றும் வன அலுவலா்கள், விழுப்புரம் மாவட்டப் பள்ளிகளில் பணிபுரியும் ஆசிரியா்கள் 130 போ் கலந்துகொண்டனா்.