கடன் பிரச்னை: இளைஞா் விஷமருந்தி தற்கொலை

விழுப்புரம் மாவட்டம், மரக்காணம் அருகே கடன் பிரச்னையால் மனமுடைந்த இளைஞா் விஷமருந்தி தற்கொலை செய்துகொண்டாா்.

மரக்காணம் வட்டம், சிறுவாடி, திரௌபதியம்மன் கோயில் தெருவைச் சோ்ந்தவா் க.பாபு (41). இவா், தனக்கு சொந்தமான 15 சென்ட் நிலத்தை தனியாா் வங்கியில் அடமானம் வைத்து, ரூ.22 லட்சம் கடன் பெற்று தனது உறவினா் தங்கமணி என்பவருக்கு பொக்லைன் இயந்திரம் வாங்குவதற்கு கொடுத்தாராம்.

இந்நிலையில், வங்கிக்கு செலுத்த வேண்டிய மாதாந்திர தவணைத் தொகையை தங்கமணி செலுத்தாததால், வங்கி நிா்வாகத்தினா் பாபுவுக்கு நீதிமன்றம் மூலம் நோட்டீஸ் அனுப்பியுள்ளனா். இதனால் மிகுந்த மன உளச்சலில் இருந்து வந்த பாபு, கடந்த ஆக.22- ஆம் தேதி பூச்சிக்கொல்லி மருந்தைக் குடித்துத் தற்கொலைக்கு முயன்றாராம். இதையடுத்து அவரை உறவினா்கள் மீட்டு புதுச்சேரி ஜிம்பா் மருத்துவமனையில் அனுமதித்தனா். அங்கு பாபு ஞாயிற்றுக்கிழமை உயிரிழந்தாா்.

இதுகுறித்த புகாரின் பேரில் பிரம்மதேசம் போலீஸாா் வழக்குப் பதிந்து, விசாரிக்கின்றனா்.