ராயன் இசை வெளியீட்டு விழா தேதி!

நடிகர் தனுஷ் நடிப்பில் உருவான ராயன் படத்தின் இசை வெளியீட்டு விழா தேதி அறிவிக்கப்பட்டுள்ளது.

நடிகர் தனுஷின் 50ஆவது படத்தை அவரே எழுதி, இயக்கி, நடித்துள்ள ராயன் திரைப்படம் ஜூன் 13ஆம் தேதி வெளியிடப்படுவதாக இருந்த நிலையில், வெளியீட்டு தேதி ஜூலை 26 ஆம் தேதிக்கு மாற்றப்பட்டுள்ளது.

கேங்ஸ்டர் கதைக்களத்தில் உருவாகியுள்ள 'ராயன்' படத்துக்கு ஏ.ஆர். ரஹ்மான் இசையமைத்துள்ளார். இந்தத் திரைப்படத்தில் செல்வராகவன், எஸ்.ஜே.சூர்யா, பிரகாஷ் ராஜ், காளிதாஸ் ஜெயராம், சந்தீப் கிஷான், நடிகை துஷாரா விஜயன், நடிகை அபர்ணா பாலமுரளி, வரலட்சுமி சரத்குமார், சரவணன் உள்ளிட்டோர் நடித்துள்ளனர்.

முன்னதாக, இப்படத்தில் இடம்பெற்ற இரண்டு பாடல்கள் வெளியாகி ரசிகர்களிடையே வரவேற்பைப் பெற்றன.

இந்த நிலையில், இப்படத்தின் இசை வெளியீட்டு விழா சென்னையில் உள்ள தனியார் கல்லூரி ஒன்றில் வருகிற ஜூலை 6 ஆம் தேதி பிரம்மாண்டமாக நடைபெற உள்ளதை தயாரிப்பு நிறுவனம் அதிகாரப்பூர்வமாக அறிவித்துள்ளது.

முன்னணி நடிகர்களின் 25, 50, 100-வது படங்கள் தோல்வியடையும் என்பதே தமிழ் சினிமாவின் செண்டிமெண்டாக இருக்கிறது.

நடிகர் அஜித்தின் 50-வது படமான மங்காத்தா திரைப்படம் மிகப்பெரிய வெற்றியைப் பெற்றதற்குப் பின் விஜய் சேதுபதியின் 50-வது படமான மகாராஜாவே அந்த வெற்றியைப் பதிவு செய்துள்ளது.

தற்போது, நடிகர் தனுஷின் 50-வது படமான ‘ராயன்’ திரைப்படமும் வெற்றி பெரும் என்கிற நம்பிக்கையில் தனுஷ் ரசிகர்கள் எதிர்பார்ப்புடன் உள்ளனர்.