இதிலும் வெற்றி கிடைக்கட்டும்... அஜித்தை வாழ்த்திய சிவகார்த்திகேயன்!

கார் பந்தயத்தில் கலந்துகொள்ளும் நடிகர் அஜித்திற்கு சிவகார்த்திகேயன் வாழ்த்து தெரிவித்துள்ளார்.

நடிகர் அஜித் குமார் விடாமுயற்சி, குட் பேட் அக்லி படங்களின் படப்பிடிப்பை முடித்துவிட்டு கார் ரேஸில் பங்கேற்க திட்டமிட்டு வந்தார். இதற்காக, கடந்த ஆண்டே ’அஜித் குமார் ரேஸிங்’ என்கிற நிறுவனத்தை தொடங்கினார்.

தற்போது கார் பந்தயத்துக்கான பயிற்சியில் அஜித் குமார் ஈடுபட்டுள்ளார். இதற்காக துபையில் தனது ஃபெராரி காரில் பயிற்சி மேற்கொண்டு வருகிறார்.

சில நாள்களுக்கு முன், பந்தயத்துக்கான பயிற்சியில் அஜித் ஈடுபட்டிருந்த போது, சாலை நடுவே இருந்த தடுப்பில் மோதியதில் அவரின் கார் நொறுங்கியது. இதில், காயமின்றி அஜித் உயிர் தப்பினார்.

இதையும் படிக்க: விடாமுயற்சி வெளியீட்டுத் தேதி இதுதானாம்!

அந்த விபத்துக்குப் பின்னர், அஜித் தற்போது முதல் முறையாக துபையின் 24 எச் ரேசிங்கில் பேட்டி ஒன்றை அளித்தார்.

அந்தப் பேட்டியில், “அடுத்த 9 மாதங்களுக்கு நான் எந்தப் படங்களிலும் நடிக்கப் போவதில்லை. வருகிற அக்டோபர் வரை படத்தில் நடக்க மாட்டேன். கார் பந்தயத்தில் அதிகம் சாதிக்க வேண்டும் என்று நினைக்கிறேன். ஒரு போட்டியாளராக மட்டுமின்றி ஒரு உரிமையாளராகவும் கூறுகிறேன். அக்டோபருக்குப் பின்னர் மார்ச்க்கு இடைப்பட்ட காலங்களில் படப்பிடிப்பில் கலந்துகொள்வேன்.” எனக் கூறியுள்ளார்.

இந்த நிலையில், கார் ரேஸில் கலந்துகொள்ளும் அஜித்துக்கு நடிகர் சிவகார்த்திகேயன் வாழ்த்து தெரிவித்துள்ளார். இதுகுறித்து அவர் வெளியிட்ட பதிவில், “துபை ரேஸில் பங்கேற்கும் நடிகர் அஜித்துக்கு என் வாழ்த்துகள். உங்களின் தீவிர ஆர்வமும் அற்பணிப்பும் எப்போதும் எங்களுக்கு ஊக்கமளித்து வருகின்றன. இதிலும் உங்களுக்கு வெற்றி கிடைக்கட்டும்” எனப் பதிவிட்டுள்ளார்.