தினமணியும் பிரபல எழுத்தாளர்களும்!

ஜெயகாந்தன்

கடலூரைச் சொந்த ஊராகக் கொண்டவர். 1969-இல், தினமணி கதிரில் இவர் எழுதிய தொடர் "சில நேரங்களில் சில மனிதர்கள்' பின்னர் நூலாகவும் வந்தது. நாவல், சாகித்ய அகாதெமி பரிசினையும் பெற்றுத் தந்தது.

*

லா.ச.ரா.

லால்குடியைச் சொந்த ஊராகக் கொண்ட ராமாமிர்தம் "தினமணி கதிரில்' 1985-இல் எழுதிய தொடர் 'சிந்தா நதி' நூலாக வெளிவந்து, சாகித்ய அகாதெமி பரிசினையும் பெற்றது.

*

பிரபஞ்சன்

புதுச்சேரியைச் சொந்த ஊராகக் கொண்ட இவர், "தினமணி கதிரில்' 1990-இல் எழுதிய தொடர் "மானுடம் வெல்லும்'. அதன் பிறகு கதிரில் இவர் எழுதிய "வானம் வசப்படும்' தொடர், நூலாக வெளிவந்து சாகித்ய அகாதெமி பரிசினையும் பெற்றது.

*

கலைஞர் மு. கருணாநிதி

தினமணி கதிர் 12.1.1973 - இதழில் "நெஞ்சுக்கு நீதி' என்கிற தன் வரலாற்றை எழுத ஆரம்பித்தார். இத் தொடர் அப்போது பரபரப்பாக பேசப்பட்டது.

*

கவிஞர் கண்ணதாசன்

தனது முந்தைய கொள்கைகளிலிருந்து மாறுபட்டு, "அர்த்தமுள்ள இந்து மதம்' என்ற தொடரினை "தினமணி கதிரில்' 1973 ஆம் ஆண்டில் எழுதி பரபரப்புக்குள்ளானார்.

*

தி. ஜானகிராமன்

தினமணி கதிரில் தி. ஜானகிராமன் எழுதிய தொடர் "செம்பருத்தி'. கதிர் அலுவலகத்துக்கு வந்து வாரா வாரம் எழுதிக் கொடுப்பதை வழக்காக கொண்டிருந்தார்.

*

சுஜாதா

"வானமெனும் வீதியிலே' என்னும் தொடரை எழுதி - விமானம் சார்ந்த தொழில்நுட்பங்கள் அனைத்தையும் அதில் கொண்டு வந்தார். எழுத்தில் - நடையில் புதுமைகள் செய்தார்.
 

*

நவீனன்

இயற்பெயர் முத்துசாமி. தினமணி ஆசிரியர் குழுவில் ஒருவராக இருந்தார். "அண்ணாவின் கதை' எழுதி பெரும் புகழ் ஈட்டினார். எக்ஸ்பிரஸ் குழுமம் 1980-இல் வெளியிட்ட "சினிமா எக்ஸ்பிரஸ்' இதழின் முதல் ஆசிரியரானார். முதல் இதழை 31.1.1980-இல் வெளியிட்டவர்: முதல்வர் எம்.ஜி.ஆர்.
 

*
 
சுப்புடு

இசைவிழா சீசனில் ஆண்டுதோறும் தில்லியில் இருந்து சென்னை வந்துவிடுவார். தனது சங்கீத விமர்சனங்களை தினமணியிலும், தினமணி கதிரிலுமாக எழுதினார். அவர் எழுதிய "பர்மா பயங்கரம்' கட்டுரையை சிறுவெளீயிடாக கதிர் வழங்கியது. இவரின் சொந்த ஊர்: பாடி - சென்னை.
 

*
 
சிவசங்கரி

தினமணி கதிரில் "புதுமையான அனுபவங்கள்' என்று அமெரிக்க அனுபவங்களைத் தொடராக எழுதினார். தொடர்ந்து கதிரில் இவர் எழுதிய பிரபல தொடர்கள்: "திரிவேணி சங்கமம்', "நண்டு', "இந்திராவின் கதை' (வாழ்க்கை வரலாறு) "ஏன்?' மற்றும் "சாமா' குறுந்தொடர். முன்னாள் முதல்வர் ஜெ. ஜெயலலிதாவின் வகுப்புத் தோழி இவர்.

*

புதுமைப்பித்தன்

1935-43 வரை தினமணியின் உதவியாசிரியராக பணிபுரிந்தபோது ஆண்டுமலர் தயாரிப்புப் பணி இவரை சேர்ந்தது. அப்போது இவர், "நாசகாரக் கும்பல்' உள்ளிட்ட பல்வேறு கதைகளை மலர்களுக்காக எழுதியிருக்கிறார்.

* 

விந்தன்

தினமணி கதிரில் பணிபுரிந்தார். இவர் எழுதிய முக்கிய தொடர்கள் "எம்.கே. தியாகராஜ பாகவர் கதை', "எம்.ஆர். ராதாவின் கதை', "எம்.கே. ராதாவின் கதை', "பாட்டினில் பாரதம்',  "ஓ மனிதா!' முக்கியமானவை.

*

 ‘சோ’ ராமஸ்வாமி

நடிகர், பத்திரிகையாளர், அரசியல் விமர்சகர் என பல்துறை வித்தகராக திகழ்ந்த சோ, தினமணி கதிரில் எழுதிய தொடரின் பெயர் "மிஸ்டர் பிரும்மதேவா!'
 

*

ஸ்ரீ வேணுகோபாலன்

"திருவரங்கன் உலா', "நீ - நான் - நிலா', "நந்தா என் நீலா' தொடர்கள் பிரபலமானவை. புஷ்பா தங்கதுரை என்கிற பெயரில் "என் பெயர் கமலா', "ஒரு ஊதாப்பூ கண் சிமிட்டுகிறது' போன்ற தொடர்களையும் எழுதி புகழ் பெற்றார்.

*

வெ. இராமசுப்ரமணியம்

தற்போது உச்சநீதி மன்ற நீதிபதிகளில் ஒருவராக உயர்வு பெற்றுள்ள வெ. இராமசுப்ரமணியம் தினமணி தமிழ்மணியில் எழுதிய ‘சொல்வேட்டை’ பகுதியில் ஏராளமான புதிய சொற்களை அறிமுகம் செய்துள்ளார்.

*

ராஜம் கிருஷ்ணன்

பெண்ணியம் சார்ந்த எழுத்தாளர். இவர் எழுதிய "பாதையில் பதிந்த அடிகள்' தொடர் மிகவும் பிரபலமானது. அத் தொடர் கம்யூனிச இயக்கத்தில் பற்றுக்கொண்ட "மாணலூர் மணி அம்மாளின்' வாழ்க்கையை அடிப்படையாகக் கொண்டது.