சிரியா அகதிகள் விவகாரம்: அரபு நாடுகளுக்கு ஆர்எஸ்எஸ் கண்டனம்

சிரியா நாட்டு அகதிகளை ஏற்க மறுக்கும் அரபு மற்றும் மேற்காசிய நாடுகளுக்கு ஆர்எஸ்எஸ் அமைப்பு கண்டனம் தெரிவித்துள்ளது.
 இதுகுறித்து அந்த அமைப்பின் அதிகாரப்பூர்வ நாளேடான ஆர்கனைஸரில் திங்கள்கிழமை வெளியாகியுள்ள தலையங்கத்தில் கூறப்பட்டுள்ளதாவது:
 உள்நாட்டுக் கலவரத்தால் பாதிக்கப்பட்டுள்ள சிரியாவிலிருந்து நாள்தோறும் ஏராளமானோர் வெளியேறி வருகின்றனர்.
 ஆனால், அவ்வாறு வெளியேறும் அகதிகளுக்கு தங்கள் நாட்டில் இடம் கொடுப்பதற்கு சில நாடுகள் மறுத்து வருகின்றன. இதில் ஐரோப்பிய நாடுகளை மட்டுமே குற்றம்சாட்டுவது நியாயமல்ல. குவைத், சவூதி அரேபியா போன்ற அரபு நாடுகளும், மேற்காசிய நாடுகளும் கூட சிரியா அகதிகளுக்கு தஞ்சம் கொடுப்பதில்லை.
 ஐரோப்பிய நாடுகளை ஒப்பிடும்போது அவர்களுக்கு இணையான செல்வ வளமை அரபு நாடுகளிடமும், மேற்காசிய நாடுகளிடமும் உள்ளது.
 ஆனால், தங்கள் சொந்த மதத்தினரையே ஏற்பதற்கு ஏதேதோ காரணங்களைக் கூறி அந்த நாடுகள் தட்டிக் கழிக்கின்றன. இதனை விட கீழ்த்தரமான செயல் என்னவாக இருக்க முடியும்?
 மனிதநேயத்தைக் காட்டிலும் ஐ.எஸ். பயங்கரவாதிகள் வகுத்துத் தந்த சித்தாந்தமே இந்த நாடுகளுக்கு பெரிதாகத் தெரிகிறது. எனவே, மதத்தின் பெயரால் நடத்தப்படும் அரசியலுக்கு முடிவுகட்ட சர்வதேசக் கருத்தொற்றுமையை ஏற்படுத்த வேண்டிய காலம் வந்துவிட்டது.
 அதே சமயத்தில், காலனி ஆதிக்கத்துக்காகவும், நாட்டை விரிவுபடுத்தும் நோக்கத்துடனும் தாங்கள் மேற்கொண்ட செயல்களின் பின்விளைவே ஐ.எஸ். பயங்கரவாத அமைப்புகளும், சிரியா பிரச்னை போன்ற விவகாரங்களும் என்பதை ஐரோப்பிய நாடுகள் மறந்துவிடக் கூடாது என அதில் தெரிவிக்கப்பட்டுள்ளது.