மும்பையில் இறைச்சி விற்பனைக்கு விதிக்கப்பட்ட தடைக்கு இடைக்காலத் தடை

மகாராஷ்டிர மாநிலம், மும்பையில் வரும் 17ம் தேதி இறைச்சி விற்பனைக்கு விதிக்கப்பட்டிருந்த தடைக்கு இடைக்காலத் தடை விதித்து மும்பை உயர் நீதிமன்றம் திங்கள்கிழமை உத்தரவிட்டது.

இதுதொடர்பாக மும்பை மாநகராட்சியால் பிறப்பிக்கப்பட்டிருந்த உத்தரவை எதிர்த்து ஆட்டிறைச்சி விற்பனையாளர்கள் சங்கத்தினர் தொடர்ந்த மனு, மும்பை உயர் நீதிமன்றத்தில் திங்கள்கிழமை விசாரணைக்கு வந்தது. அப்போது நீதிபதிகள் கூறியதாவது:

மும்பையில் இறைச்சி விற்பனைக்கு வரும் 17ம் தேதி விதிக்கப்பட்டிருந்த தடைக்கு இடைக்காலத் தடை விதிக்கப்படுகிறது. இந்த இடைக்காலத் தடையானது, மும்பை நகர் பகுதிக்கு மட்டுமே பொருந்தும்.

அதேசமயம், மும்பையில் வரும் 17ம் தேதியன்று ஆடு, கோழிகள் உள்ளிட்டவற்றை கொல்வதற்கும், அவைகளை கொல்வதற்கு பயன்படுத்தப்படும் இடங்களை மூடுவதற்கும் விதிக்கப்பட்ட தடைகளில் நீதிமன்றம் தலையிடாது என்றும் உத்தரவில் குறிப்பிட்டுள்ளனர்.