விடைத்தாள் திருத்துவதில் குளறுபடி: 130 ஆசிரியர்களுக்கு எதிராக சிபிஎஸ்இ நடவடிக்கை

10 மற்றும் 12-ஆம் வகுப்பு பொதுத் தேர்வு விடைத்தாள்களை திருத்தியதில் பல்வேறு தவறுகள் நேரிட்ட காரணத்தால் 130 ஆசிரியர்களுக்கு எதிராக மத்திய இடைநிலை கல்வி வாரியம் (சிபிஎஸ்இ) நடவடிக்கை எடுத்துள்ளது.
இதுகுறித்து அந்த வாரிய அதிகாரிகள் கூறியதாவது:
பொதுத் தேர்வு விடைத்தாள்களை திருத்தியதில் சில ஆசிரியர்கள் அலட்சியத்துடனும், கவனக்குறைவுடனும் செயல்பட்டது தெரியவந்துள்ளது. 
பிகார் மாநிலம், பாட்னாவில் அதிகபட்சமாக 45 ஆசிரியர்கள் அலட்சியத்துடன் விடைத்தாள்களை திருத்தியிருக்கிறார்கள். இதனால், பல மாணவர்கள் பாதிக்கப்பட்டனர். சிபிஎஸ்இ-க்கு இருக்கும் நற்பெயருக்கும் இவர்களால் களங்கம் ஏற்பட்டது.
தவறிழைத்த ஆசிரியர்கள் பணிபுரியும் பள்ளிகளுக்கு அவர்களை பணியிடைநீக்கம் செய்யுமாறு உத்தரவு அனுப்பியிருக்கிறோம். 
சென்னையில் 14 ஆசிரியர்களும், அலாகாபாதில் 11 ஆசிரியர்கள், புவனேசுவரத்தில் 7 ஆசிரியர்கள், தில்லியில் 6 ஆசிரியர்கள் விடைத்தாள் திருத்தியபோது தவறிழைத்திருக்கின்றனர்.
பாட்னாவுக்கு அடுத்தபடியாக உத்தரகண்ட் மாநிலம், டேராடூனில் 27 ஆசிரியர்கள் அலட்சியத்துடன் விடைத்தாள்களை திருத்தியது தெரியவந்துள்ளது. மொத்த மதிப்பெண்ணை கூட்டுவதில் பெரும்பாலும் தவறிழைக்கப்பட்டுள்ளது என்று அந்த அதிகாரி தெரிவித்தார்.