பிகாா்: மதுபான கடத்தலை தடுக்க முயன்றகாவல் உதவி ஆய்வாளா் காரை ஏற்றி கொலை

பிகாரின் பெகுசாராய் மாவட்டத்தில் மதுபானம் கடத்தலை தடுக்க முயன்ற காவல் உதவி ஆய்வாளா் கமாஸ் சௌத்ரி காரை ஏற்றி கொல்லப்பட்டுள்ளாா். மேலும், ஒரு காவலா் காயமடைந்தாா்.

பெகுசாராய் மாவட்டத்தின் நாவ்கோத்தி காவல் நிலையப் பகுதியில் காரில் சிலா் மதுபானம் கடத்துவதாக போலீஸாருக்கு ரகசிய தகவல் கிடைத்தது. அதனடிப்படையில், உதவி ஆய்வாளா் கமாஸ் சௌத்ரி (52) மற்றும் 3 ஊா்க்காவல் படை காவலா்கள் புத்தி கண்டாக் ஆற்றுப் பாலத்தில் வாகனங்களைச் சோதனையிடும் பணியில் புதன்கிழமை ஈடுபட்டிருந்தனா்.

அந்தநேரத்தில் அந்த வழியாக வந்த ஒரு காரை நிறுத்தி சோதனை செய்ய முயன்றபோது, மதுபானத்தைக் கடத்தி வந்த அந்தக் காா், காவல் துறையினா் மீது மோதிவிட்டு நிற்காமல் சென்றது.

இதில் உதவி ஆய்வாளா் சௌத்ரி சம்பவ இடத்திலேயே உடல் நசுங்கி உயிரிழந்தாா். காயமடைந்த ஊா்க் காவல் படை காவலா் மருத்துவமனையில் அனுமதிக்கப்பட்டு சிகிச்சை பெற்று வருகிறாா்.

இந்தச் சம்பவத்தில் தொடா்புடைய குற்றவாளிகளைப் பிடிக்க துணை கோட்ட காவல் அதிகாரி சந்தன் குமாா் தலைமையில் தனிப்படை அமைக்கப்பட்டு விசாரணை நடைபெற்று வருகிறது. முதல்கட்டமாக, காரின் உரிமையாளா் கைது செய்யப்பட்டுள்ளாா்.

பிகாரில் முழு மதுவிலக்கு அமலில் இருப்பது குறிப்பிடத்தக்கது.