எதிா்க்கட்சிகள் ஆளும் மாநிலங்கள் மீது மத்திய அரசு மாற்றாந்தாய் மனப்பான்மை: மக்களவையில் எம்.பி.க்கள் குற்றச்சாட்டு

எதிா்க்கட்சிகள் ஆளும் மாநிலங்கள் மீது மத்திய அரசு மாற்றாந்தாய் மனப்பான்மையுடன் நடந்துகொள்வதாக, மக்களவையில் நடைபெற்ற விவாதத்தில் எதிா்க்கட்சி எம்.பி.க்கள் குற்றம்சாட்டினா்.

நாடாளுமன்றத்தில் கடந்த செவ்வாய்க்கிழமை தாக்கல் செய்யப்பட்ட மத்திய பட்ஜெட்டில், பாஜக கூட்டணி கட்சிகள் ஆளும் ஆந்திரம் (தெலுங்கு தேசம்), பிகாா் (ஐக்கிய ஜனதா தளம்) ஆகிய மாநிலங்களுக்குசிறப்பு நிதி தொகுப்புகள் அறிவிக்கப்பட்டன. இதன் மூலம் பாஜக கூட்டணி அல்லாத கட்சிகள் ஆளும் மாநிலங்களுக்கு பாரபட்சம் காட்டப்பட்டுள்ளதாக, எதிா்க்கட்சிகள் குற்றம்சாட்டின

இந்நிலையில், மக்களவையில் வெள்ளிக்கிழமை நடைபெற்ற பட்ஜெட் மீதான விவாதத்தில் ஆம் ஆத்மி எம்.பி. குா்மீத் சிங் பேசியதாவது:

மத்திய அரசின் தற்போதைய பட்ஜெட், கூட்டணி கட்சிகளின் நிா்பந்தத்தால் உந்தப்பட்ட பட்ஜெட்டாகும். வெள்ளத்தால் பாதிக்கப்பட்ட பிற மாநிலங்களுக்கு நிதி ஒதுக்கீடு செய்யப்பட்டுள்ளது. ஆனால், பஞ்சாபுக்கு மட்டும் நிதி ஒதுக்காதது ஏன்? என்று அவா் கேள்வியெழுப்பினாா்.

ராஷ்ட்ரீய லோக்தந்திரிக் கட்சி எம்.பி. ஹனுமன் பெனிவால் பேசுகையில், ‘பாஜக கூட்டணி கட்சிகள் தவிர பிற கட்சிகள் ஆளும் அனைத்து மாநிலங்களையும் மத்திய அரசு மாற்றாந்தாய் மனப்பான்மையுடன் நடத்துகிறது’ என்று குற்றம்சாட்டினாா்.

மேலும், பயிா்களுக்கான குறைந்தபட்ச ஆதரவு விலைக்கு சட்டபூா்வ உத்தரவாதம் அளிக்க வேண்டும்; அக்னிபத் திட்டத்தை ரத்து செய்ய வேண்டும் என்றும் அவா் வலியுறுத்தினாா்.

சிரோமணி அகாலி தளம் எம்.பி. ஹா்சிம்ரத் கெளா் பேசுகையில், ‘தங்களது ஆட்சியைக் காப்பாற்றும் பட்ஜெட்டை மத்திய அரசு தாக்கல் செய்துள்ளது. 9 மாநிலங்கள் மட்டுமே பட்ஜெட்டில் குறிப்பிடப்பட்டுள்ளன. மத்திய அரசு எந்த இருவரின் தோளில் ஏறி நிற்கிறதோ, அவா்கள் ஆளும் மாநிலங்களுக்கு முன்னுரிமை அளிக்கப்பட்டுள்ளது’ என்றாா்.

கேரளத்தைச் சோ்ந்த இந்திய யூனியன் முஸ்லிம் லீக் கட்சி எம்.பி. அப்துஸ்ஸமத் சமதானி பேசுகையில், ‘தங்களது கூட்டணி கட்சிகளை திருப்திப்படுத்துவதற்காக பெரும்பாலான மாநிலங்களின் நலனை தியாகம் செய்துவிட்டது மத்திய அரசு. இது ஜனநாயகம் மற்றும் கூட்டாட்சிக்கு விரோதமானது’ என்றாா்.

அமளி- ஒத்திவைப்பு: மக்களவையில் வெள்ளிக்கிழமை கேள்விநேரத்தின்போது, பல்வேறு விவகாரங்களை எழுப்பி, எம்.பி.க்கள் அமளியில் ஈடுபட்டனா்.

மேற்கு வங்கத்தை இரு மாநிலங்களாக பிரிக்க வேண்டுமென்ற பாஜக மூத்த தலைவா்களின் கருத்தை முன்வைத்து, ஆளும் திரிணமூல் காங்கிரஸ் எம்.பி.க்கள் கடும் அமளியில் ஈடுபட்டனா். அதேநேரம், கா்நாடக அமைச்சா் தொடா்புடைய வால்மீகி கூட்டுறவு ஊழல் விவகாரத்தை பாஜக எம்.பி.க்கள் எழுப்பினா். அமளி காரணமாக, மக்களவை சிறிது நேரம் ஒத்திவைக்கப்பட்டது.

மாநிலங்களவையில்...: பிற்படுத்தப்பட்ட பிரிவினருக்கு அவா்களின் மக்கள்தொகை விகிதாசாரத்தின் அடிப்படையில் இடஒதுக்கீடு வழங்கும் வகையில் அரசமைப்புச் சட்டம் 16-ஆவது பிரிவில் திருத்தம் கோரும் தனிநபா் மசோதாவை, மாநிலங்களவையில் சமாஜவாதி எம்.பி. ஜாவத் அலிகான் வெள்ளிக்கிழமை தாக்கல் செய்தாா்.

அப்போது பேசிய அவா், ‘இடஒதுக்கீடு முறையால் தகுதியானவா்கள் உயா் பதவிக்கு வர முடியாது என்ற வாதம் தவறானது. அது, பிற்படுத்தப்பட்டோரின் உரிமைகளை பறிப்பதற்காக கூறப்படும் கட்டுக்கதை. 69 சதவீதம் இடஒதுக்கீடு வழங்கும் தமிழகத்தின் பொருளாதார வளா்ச்சி, நாட்டிலேயே இரண்டாவது இடத்தில் உள்ளது. மத்திய அரசில் பட்டியல் பிரிவினா், பழங்குடியினா், இதர பிற்படுத்தப்பட்டோருக்கு ஒதுக்கப்பட்ட இடங்களை நிரப்ப எவ்வித சிறப்பு நடவடிக்கையையும் பாஜக அரசு மேற்கொள்ளவில்லை’ என்றாா்.

இந்த மசோதா மீது காங்கிரஸ் எம்.பி. நீரஜ் தாங்கி தெரிவித்த சில கருத்துகளுக்கு எதிா்ப்பு தெரிவித்து, பாஜக எம்.பி.க்கள் கோஷமிட்டனா். அப்போது, அவையை வழிநடத்திய நாகாலாந்தைச் சோ்ந்த பாஜக எம்.பி. பாங்னோன் கோன்யாங், அவை அலுவல்களை ஒரு மணிநேரம் ஒத்திவைத்தாா்.