முன்னாள் இந்திய ஹாக்கி வீரர் குர்பக்ஸ் சிங் கிரேவால் காலமானார்!

ஒலிம்பிக் போட்டியில் வெண்கல பதக்கம் வென்ற முன்னாள் இந்திய ஹாக்கி வீரர் குர்பக்ஸ் சிங் கிரேவால் காலமானார்.

பஞ்சாப் மாநிலத்தைச் சேர்ந்த முன்னாள் இந்திய ஹாக்கி வீரர் குர்பக்ஸ் சிங் கிரேவால் மற்றும் அவரது சகோதரர் பல்பீர் சிங் கிரேவால் ஆகிய இருவரும் கடந்த 1968 ஆம் ஆண்டு மெக்சிகோவில் நடைபெற்ற ஒலிம்பிக் போட்டியில் பங்கேற்ற இந்திய அணியில் இடம்பெற்றனர்.

இந்திய விளையாட்டுத் துறையில் ஒரே குடும்பத்தைச் சேர்ந்த சகோதரர்கள் ஒன்றாக தேசிய அணியில் விளையாடுவது அரிய நிகழ்வாகக் கருதப்படும் நிலையில், கிரேவால் சகோதரர்கள் இடம்பெற்ற இந்திய ஹாக்கி அணி மெக்சிகோ ஒலிம்பிக் போட்டியில் வெண்கல பதக்கம் வென்றது.

இந்த நிலையில், பஞ்சாபின் ஜிராக்பூரில் உள்ள தனது இல்லத்தில் 84 வயதான குர்பக்ஸ் சிங் கிரேவால் கடந்த வெள்ளிக்கிழமை (ஏப். 24) மாலை திடீர் மாரடைப்பால் காலமானார் என அவரது குடும்பத்தினர் தெரிவித்துள்ளனர்.

முன்னதாக, குர்பக்ஸ் சிங் மேற்கு ரயில்வே துறையின் விளையாட்டுப் பிரிவு அதிகாரியாகவும் மும்பை ஹாக்கி சங்கத்தின் செயலாளராகவும் பதவி வகித்து, ஏராளமான வீரர்களை இந்திய அணியில் சேர்த்துள்ளது குறிப்பிடத்தக்கது.