வங்கி மோசடி: பிகாரில் ஒருவா் கைது

ஏபிகே கோப்பு மூலம் வங்கி மோசடியில் ஈடுபட்டதாகக் கூறப்படும் நபரை பிகாரின் அவுரங்காபாத் மாவட்டத்தில் தில்லி காவல் துறையினா் கைது செய்ததாக அதிகாரிகள் ஞாயிற்றுக்கிழமை தெரிவித்தனா்.

இதுகுறித்து காவல் துறையினா் மேலும் கூறியதாவது: கைது செய்யப்பட்டவா் அவுரங்காபாத் மாவட்டம் மதன்பூா் பகுதியைச் சோ்ந்த சசிகாந்த் குமாா் என அடையாளம் காணப்பட்டுள்ளாா். தில்லியைச் சோ்ந்த ஒருவரின் வங்கிக் கணக்கில் இருந்து அனுமதியின்றி 3 பரிவா்த்தனைகள் மேற்கொள்ளப்பட்டதாக அளிக்கப்பட்ட புகாரின் அடிப்படையில் வழக்குப் பதிவு செய்யப்பட்டது. அந்தப் பரிவா்த்தனைகளை தான் மேற்கொள்ளவில்லை என்றும், தனது வங்கி கணக்கு தொடா்பான ரகசியத் தகவல்களை யாரிடமும் பகிரவில்லை என்றும் புகாா்தாரா் தெரிவித்திருந்தாா்.

இதையடுத்து, காவல் துறையினா் ஐபி பதிவுகள், அழைப்பு விவரப் பதிவுகள், வங்கிக் கணக்கு விவரங்கள், பணப் பரிவா்த்தனை முறைகள் உள்ளிட்ட பல்வேறு டிஜிட்டல் ஆதாரங்களை ஆய்வு செய்தனா். விசாரணையில், பாதிக்கப்பட்டவரின் செல்போனுக்கு தீங்கிழைக்கும் ஏபிகே கோப்பு அனுப்பப்பட்டு, அது நிறுவப்பட்டதால் கைப்பேசி ஊடுருவலுக்கு உள்ளானதாகவும், அதன் மூலம் அனுமதியற்ற வங்கிப் பரிவா்த்தனைகள் மேற்கொள்ளப்பட்டதாகவும் தெரியவந்தது.

சசிகாந்த் குமாா், பாதிக்கப்பட்டவா்களுக்கு இதுபோன்ற தீங்கிழைக்கும் கோப்புகளை அனுப்பி, மோசடி செய்யப்பட்ட பணத்தை போலி வங்கிக் கணக்குகள் மூலம் மாற்றியதாகக் கூறப்படும் சைபா் மோசடி கும்பலில் இடம்பெற்றிருந்தது. இந்த வங்கிக் கணக்குகள், எரிவாயு இணைப்பு மற்றும் பிற அரசு நலத்திட்டப் பலன்களைப் பெற்றுத் தருவதாகக் கூறி கிராம மக்களிடம் இருந்து பெறப்பட்டதாகவும் விசாரணையில் தெரியவந்துள்ளது.

மோசடி மூலம் பெறப்பட்ட பணத்தை சசிகாந்த் நிா்வகித்து, அதில் ஒரு பகுதியை கமிஷனாக வைத்துக்கொண்டு, மீதமுள்ள தொகையை தனது கூட்டாளிகளுக்கு மாற்றியதாகக் கூறப்படுகிறது. அவரிடமிருந்து ஒரு கைப்பேசி மற்றும் சிம் காா்டு பறிமுதல் செய்யப்பட்டுள்ளன. இந்த மோசடி தொடா்பாக மேலும் விசாரணை நடைபெற்று வருகிறது என காவல் துறையினா் தெரிவித்தனா்.