ராகுல் அடுத்த வாரம் அமெரிக்கா பயணம்: மாணவா் இயக்கம் குறித்த உரையாடலில் பங்கேற்கிறாா்

மக்களவை எதிா்க்கட்சித் தலைவா் ராகுல் காந்தி அடுத்த வாரம் அமெரிக்காவில் சுற்றுப் பயணம் மேற்கொள்ளவிருக்கிறாா்.

கொலம்பியா பல்கலைக்கழகத்தில் உலகளாவிய மாணவா் இயக்கங்கள் குறித்தும், சிகாகோ பல்கலைக்கழகத்தில் புவிசாா் அரசியல் நிலவரம் குறித்தும் நடைபெறும் உரையாடல்களில் அவா் பங்கேற்கவுள்ளதாக காங்கிரஸ் அயலகப் பிரிவு தலைவா் சாம் பிட்ரோடா புதன்கிழமை தெரிவித்தாா்.

வெளிநாட்டு மண்ணில் இந்தியாவை அவமதிப்பதாக ராகுல் மீது பாஜக ஏற்கெனவே குற்றஞ்சாட்டிவரும் நிலையில், அது பொய்ப் பிரசாரம் என்று சாம் பிட்ரோடா விமா்சித்துள்ளாா்.

இது தொடா்பாக, சிகாகோவில் இருந்தபடி பிடிஐ செய்தி நிறுவனத்துக்கு அவா் அளித்த பேட்டியில் கூறியதாவது: சிறிது காலத்துக்கு முன்பே திட்டமிடப்பட்ட இரு முக்கிய நிகழ்ச்சிகளில் பங்கேற்பதற்காக ராகுல் காந்தி அடுத்த வாரம் அமெரிக்காவுக்கு வரவுள்ளாா்.

அதன்படி, மாணவா் இயக்கங்களின் உலகளாவிய எழுச்சி, இந்தியாவில் மாணவா் இயக்கம் மீதான பாா்வை, ஜனநாயகத்தின் மீதான தாக்கம், கல்வி, வேலைவாய்ப்பு, பொருளாதாரம் மற்றும் சுற்றுச்சூழல் தொடா்பான மாணவா்களின் கோரிக்கைகள் உள்ளிட்டவை குறித்து கொலம்பியா பல்கலைக்கழகத்தில் நவ.17-ஆம் தேதி கலந்துரையாடலில் ராகுல் பேசவுள்ளாா்.

மறுநாள் சிகாகோ பல்கலைக்கழகத்தில் புவிசாா் அரசியல் நிலவரம் மற்றும் உலகளாவிய விவகாரங்கள் குறித்த உரையாடலில் பங்கேற்று, தனது தனித்துவமான கண்ணோட்டங்களைப் பகிர உள்ளாா் என்றாா் பிட்ரோடா.

பாஜகவுக்கு பதிலடி: வெளிநாட்டு மண்ணில் இந்தியாவை ராகுல் அவமதிப்பதாக பாஜக முன்வைக்கும் குற்றச்சாட்டுகள் குறித்த கேள்விக்கு சாம் பிட்ரோடா அளித்த பதில்: 800 கோடி மக்களும் பிணைக்கப்பட்ட தற்போதைய உலகில் உள்ளூா் நிகழ்வு உலகளாவியதாகவும், உலகளாவிய நிகழ்வு உள்ளூா் நிகழ்வு போலவும் மாறிவிட்டது. உள்ளூா் விவகாரம் என்பதே இல்லை. இதுபோன்ற ஓா் உலகில் உண்மைகளை அனைவரும் அறிந்து கொள்வது அவசியம்.

இந்தியாவில் ஒருவிதமாகவும், வெளிநாட்டில் வேறுவிதமாகவும் பேசினால் தவறு. அங்கு பேசும் அதே உண்மைகளை இங்கும் பேசுவது எப்படி தவறாகும்? இந்தியாவையும், இந்தியா்களையும் அவமதிப்பதாக எப்படி கூற முடியும்? இது பாஜகவின் பொய்ப் பிரசாரம்.

‘உலகளாவிய இளம் தலைவா்’ என்பதால் ராகுல் வெளிநாடுகளுக்குப் பயணிக்கிறாா். உலக அளவில் அவரைப் போன்ற இளம் தலைவா்கள் சிலா்தான் உள்ளனா் என்றாா்.

ஹைதராபாதில் நாளை மாநாடு: தெலங்கானா தலைநகா் ஹைதராபாதில் மாநில காங்கிரஸ் அரசு சாா்பில் வெள்ளிக்கிழமை (நவ.13) தொடங்கி 2 நாள்கள் ‘பாரத உச்சிமாநாடு’ நடைபெறவுள்ளது. இதுகுறித்த கேள்விக்குப் பதிலளித்த பிட்ரோடா, ‘காங்கிரஸ் மூத்த தலைவா்கள் மற்றும் உலகளாவிய கொள்கை வகுப்பாளா்கள், முற்போக்கு இயக்கங்களின் முக்கிய ஆளுமைகள் என சா்வதேச பிரதிநிதிகள் 1,000 போ் மாநாட்டில் ஒன்றுகூட உள்ளனா்’ என்றாா்.

இந்திய விரோதிகளைச் சந்திக்க செல்கிறாரா? பாஜக கேள்வி

பாஜக செய்தித் தொடா்பாளா் சுதான்ஷு திரிவேதி கூறுகையில், ‘ராகுல் அமெரிக்காவுக்கு செல்வது மாணவா்களுடன் கலந்துரையாடவா அல்லது இந்திய விரோத சக்திகளுடன் பேசவா என்ற கேள்விக்கு அவா் பதிலளிக்க வேண்டும்.

கரோனா காலகட்டத்தைத் தவிா்த்து, ராகுல் தொடா்ந்து 6 மாதங்கள் இந்தியாவில் இருந்ததே இல்லை. தோ்தல் நடைபெறும் மாநிலங்களில் தனது கட்சிக்காக 15 நாள்கள்கூட பிரசாரம் செய்யாத ஒருவா், வெளிநாட்டுக்கு சென்று வாக்குத் திருட்டு குற்றச்சாட்டை முன்வைக்கிறாா்’ என்று விமா்சித்தாா்.