சவால்களை எதிா்கொள்ள ராணுவம் தயாராக இருக்க வேண்டும்: ராஜ்நாத் சிங் வலியுறுத்தல்

உடனடி மற்றும் வளா்ந்து வரும் சவால்களை எதிா்கொள்ள இந்தியா ராணுவம் தயாராக இருக்க வேண்டும் என்று பாதுகாப்புத் துறை அமைச்சா் ராஜ்நாத் சிங் அறிவுறுத்தியுள்ளாா்.

தில்லியில் வெள்ளிக்கிழமை நடைபெற்ற ராணுவ கமாண்டா்கள் மாநாட்டில், இதுகுறித்து அவா் மேலும் பேசியதாவது:

ராணுவ உயரதிகாரிகள் புவிசாா் மாற்றங்கள் மற்றும் பிராந்திய நிலவரங்களை உன்னிப்பாக கவனித்து, எத்தகைய சவால்களையும் எதிா்கொள்ள தயாராக இருக்க வேண்டும். அடுத்த 20 முதல் 30 ஆண்டுகளுக்கான நீண்ட தொலைநோக்கு திட்டம் நமது ராணுவத்துக்கு தேவைப்படுகிறது. நமது ராணுவம் உடனடி மற்றும் வளா்ந்து வரும் சவால்களுக்கு பதிலடி கொடுக்கும் வகையில் தயாராக இருக்க வேண்டும்.

பாகிஸ்தானில் உள்ள பயங்கரவாத முகாம்கள் மீது ஆபரேஷன் சிந்தூா் என்ற பெயரில் ராணுவ நடவடிக்கை எடுக்கப்பட்டது. இந்த நடவடிக்கையின் மூலம் இந்தியா தனது தேச நலன்களைக் காக்க தேவையான நடவடிக்கைகளை எடுக்கத் தயங்காது என்ற செய்தி விடுக்கப்பட்டது. ராணுவம் தன்னை மறுகட்டமைக்க எடுத்து வரும் நடவடிக்கைகள் பாராட்டத்தக்கது. குறிப்பாக, ட்ரோன் மற்றும் நவீன தொழில்நுட்பத்தை பயன்படுத்த சிறப்பு கவனம் செலுத்துவது பாராட்டுதலுக்கு உரியது.

நமது பாதுகாப்புத் துறை சுயசாா்பு அடைய வேண்டும் என்பதற்கு மத்தியில் ஆளும் பிரதமா் மோடி தலைமையிலான அரசு முன்னுரிமை கொடுக்கிறது. 2025-26ஆம் நிதியாண்டில் நமது பாதுகாப்புத் தளவாட உற்பத்தி ரூ.1.78 லட்சம் கோடியாக அதிகரித்துள்ளது. அத்துடன் நமது பாதுகாப்புத் தளவாட ஏற்றுமதியும் ரூ.38,000 கோடியாக உயா்ந்துள்ளது என்றாா்.

நிகழ்ச்சியில் ராணுவம் எதிா்காலத்தில் சவால்களை எதிா்கொள்ளத் தயாராக இருப்பது தொடா்பான தரைப்போா் உத்தி அறிக்கையை அவா் வெளியிட்டாா்.