கோவை: செந்தில் பாலாஜிக்கு ஜாமீன் கிடைத்திருப்பது மகிழ்ச்சியான செய்தி எனவும் அவருக்கு அமைச்சர் பொறுப்பு அளிப்பது குறித்து கட்சித் தலைமை முடிவெடுக்கும் என வீட்டு வசதித் துறை அமைச்சர் முத்துசாமி தெரிவித்தார்.

கோவையிலுள்ள தமிழ்நாடு வேளாண் பல்கலைகழகத்தில் நடைபெறும் “உழவர் நாள் விழா” கண்காட்சியினை வீட்டு வசதித்துறை அமைச்சர் முத்துசாமி மற்றும் வேளாண்துறை அமைச்சர் எம்.ஆர்.கே.பன்னீர் செல்வம் ஆகியோர் சிறப்பு விருந்தினராக கலந்துகொண்டு தொடங்கி வைத்து கண்காட்சியை பார்வையிட்டனர்.

பின்னர் செய்தியாளர்களுக்கு பேட்டியளித்த அமைச்சர் முத்துசாமி, செந்தில்பாலாஜிக்கு ஜாமீன் கிடைத்திருப்பது நல்ல செய்தி. இது நீண்ட நாட்களாக எதிர்பார்த்த ஒன்று. செந்தில்பாலாஜி விவகாரத்தில் உச்ச நீதிமன்றம் சரியான ஒரு நல்ல முடிவை இன்று வழங்கியுள்ளது. இதனை மிகப்பெரிய மகிழ்ச்சிக்குரிய செய்தியாக நாங்கள் எடுத்துக் கொள்கிறோம். இதற்கு முன்னால் பல சிரமங்களும், தேவை இல்லாமல் சட்டத்திற்கு புறம்பாக பல பிரச்னைகளும் சந்திக்க வேண்டிய சூழல் ஏற்பட்டது. ஆனால் இன்றைக்கு அதற்கெல்லாம் ஒரு முற்றுப்புள்ளி வைக்கப்பட்டு இருப்பது மகிழ்ச்சி அளிக்கிறது.

அமைச்சர் பொறுப்பு

முதல்வர் வேறொரு நிகழ்ச்சிக்காக தில்லி செல்கிறார். எங்களைப் பொறுத்தவரை செந்தில்பாலாஜிக்கு ஜாமீன் கிடைத்திருப்பதை வெற்றியான மகிழ்ச்சியான செய்தியாக கருதுகிறோம். அவருக்கான அமைச்சர் பொறுப்பு குறித்து கட்சித் தலைமையும் முதல்வரும் முடிவெடுப்பார்கள்.

மேலும் விவசாயிகளுக்கு பயனுள்ள வகையில் தமிழ்நாடு வேளாண்மை பல்கலைக்கழகத்தில் மாநில அளவிலான உழவர் மாநாடு நிகழ்ச்சி நடைபெற்று வருவதாக முத்துசாமி கூறினார்.