டெஸ்ட் தொடர்: பிரபல ஆஸி. வேகப்பந்து வீச்சாளர் விலகல்!

இந்தியாவுக்கு எதிரான டெஸ்ட் தொடரிலிருந்து பிரபல ஆஸ்திரேலிய வேகப்பந்து வீச்சாளர் ஹேசில்வுட் விலகியுள்ளார்.

இந்தியாவில் 4 டெஸ்டுகளில் விளையாடும் ஆஸ்திரேலிய அணி, அடுத்ததாக 3 ஆட்டங்கள் கொண்ட ஒருநாள் தொடரிலும் பங்கேற்கிறது. டெஸ்ட் தொடரில் முதல் இரு டெஸ்டுகளிலும் வெற்றி பெற்ற இந்திய அணி 2-0 என முன்னிலை வகிக்கிறது. 3-வது டெஸ்ட், இந்தூரில் மார்ச் 1 அன்று தொடங்குகிறது.

இந்நிலையில் காயம் காரணமாக ஆஸ்திரேலிய வேகப்பந்து வீச்சாளர் ஹேசில்வுட் டெஸ்ட் தொடரிலிருந்து விலகியுள்ளார். குதிகால் தசைநார் பகுதியில் காயம் ஏற்பட்டதால் முதல் இரு டெஸ்டுகளிலும் அவர் விளையாடவில்லை. எனினும் காயம் குணமாகாததால் டெஸ்ட் தொடரிலிருந்து விலகி ஊருக்குத் திரும்பவுள்ளார். இதனை ஆஸ்திரேலிய அணியின் பயிற்சியாளர் ஆண்ட்ரூ மெக்டொனால்ட் உறுதி செய்துள்ளார்.