உலக டெஸ்ட் சாம்பியன்ஷிப்: முதலிடத்தில் நிலைக்கும் இந்தியா

துபை: வங்கதேசத்துக்கு எதிரான முதல் டெஸ்ட் வெற்றியால் உலக டெஸ்ட் சாம்பியன்ஷிப் புள்ளிகள் பட்டியலில் இந்தியா முதலிடத்தை தக்கவைத்துக் கொண்டுள்ளது.

இந்தியா 71.67 புள்ளிகள் சதவீதத்துடன் அந்த இடத்திலிருக்க, நடப்பு சாம்பியன் ஆஸ்திரேலியா 2-ஆவது இடத்தில் (62.50%) உள்ளது. நியூஸிலாந்துக்கு எதிரான முதல் டெஸ்ட்டில் வென்ற இலங்கை ஓரிடம் முன்னேறி 3-ஆவது இடத்தை (50%) பிடித்திருக்கிறது. அந்த இடத்திலிருந்த நியூஸிலாந்து 4-ஆவது இடத்துக்கு (42.86%) சறுக்கியுள்ளது.

இங்கிலாந்து 5-ஆவது இடத்தில் (42.19%) இருக்க, பாகிஸ்தானுடனான டெஸ்ட் தொடரை வென்று 4-ஆவது இடத்திலிருந்த வங்கதேசம், தற்போது இந்தியாவுடனான தோல்வியைத் தொடர்ந்து 6-ஆவது இடத்துக்கு (39.29%) இறங்கியிருக்கிறது. தென்னாப்பிரிக்கா (38.89%), பாகிஸ்தான் (19.05%), மேற்கிந்தியத் தீவுகள் (18.52%) ஆகியவை முறையே கடைசி 3 இடங்களில் உள்ளன.

டெஸ்ட் சுழற்சி முடிவில் இந்தப் பட்டியலில் முதலிரு இடங்களைப் பிடிக்கும் அணிகளே, உலக டெஸ்ட் சாம்பியன்ஷிப் இறுதி ஆட்டத்தில் மோதும் என்பது குறிப்பிடத்தக்கது.