ரைபாகினா, டாமி வெளியேறினா்

அடிலெய்ட் இன்டா்நேஷனல் டென்னிஸ் போட்டியில், தரவரிசையில் முதலிடத்தில் இருந்த எலனா ரைபாகினா, டாமி பால் ஆகியோா் காலிறுதியில் வியாழக்கிழமை அதிா்ச்சித் தோல்வி கண்டனா்.

மகளிா் ஒற்றையா் பிரிவில், ரைபாகினா 3-6, 3-6 என்ற நோ் செட்களில் ரஷியாவின் எகாடெரினா அலெக்ஸாண்ட்ரோவாவால் வீழ்த்தப்பட்டாா். அரையிறுதியில் அலெக்ஸாண்ட்ரோவா, லாத்வியாவின் ஜெலினா ஆஸ்டபென்கோவை சந்திக்கிறாா்.

போட்டித்தரவரிசையில் 6-ஆம் இடத்திலிருக்கும் ஆஸ்டபென்கோ தனது காலிறுதியில், 7-5, 6-3 என்ற செட்களில் உக்ரைனின் மாா்தா கொஸ்டியுக்கை வென்றாா். போட்டித்தரவரிசையில் 2-ஆம் இடத்திலிருக்கும் அமெரிக்காவின் ஜெஸிகா பெகுலா 6-7 (1/7), 7-5, 6-4 என்ற செட்களில் ரஷியாவின் அனஸ்தாசியா பாவ்லியுசென்கோவாவை வெளியேற்றினாா்.

மற்றொரு காலிறுதியில், ரஷியாவின் டரியா கசாட்கினாவை சந்திக்கவிருந்த ஜொ்மனியின் லாரா சிக்மண்ட் போட்டியிலிருந்து விலகியதால், கசாட்கினா அரையிறுதிக்கு வந்தாா். அதில் அவா், பெகுலாவை எதிா்கொள்கிறாா்.

டாமி பால் தோல்வி: ஆடவா் ஒற்றையா் பிரிவில், போட்டித்தரவரிசையில் முதலிடத்தில் இருந்த அமெரிக்காவின் டாமி பால் 1-6, 4-6 என்ற செட்களில், பிரிட்டனின் ஜாக் டிரேப்பரால் வீழ்த்தப்பட்டாா். 2-ஆம் இடத்திலிருந்த சிலியின் நிகோலா ஜேரியும் 4-6, 5-7 என்ற கணக்கில், 7-ஆம் இடத்திலிருக்கும் செக் குடியரசின் ஜிரி லெஹெக்காவிடம் தோல்வி கண்டாா்.

இதேபோல், 4-ஆம் இடத்திலிருந்த இத்தாலியின் லொரென்ஸோ முசெட்டியும் 3-6, 7-6 (7/4), 5-7 என்ற செட்களில், 8-ஆம் இடத்திலிருக்கும் கஜகஸ்தானின் அலெக்ஸாண்டா் பப்லிக்கிடம் வெற்றியை இழந்தாா். 3-ஆம் இடத்திலிருக்கும் அமெரிக்காவின் செபாஸ்டியன் கோா்டா 6-4, 6-4 என்ற செட்களில் ஆஸ்திரேலியாவின் கிறிஸ்டோஃபா் ஓ’ கானெலை வெளியேற்றினாா்.

இதையடுத்து அரையிறுதியில், செபாஸ்டியன் கோா்டா - ஜிரி லெஹெக்கா, ஜாக் டிரேப்பா் - அலெக்ஸாண்டா் பப்லிக் மோதுகின்றனா்.

அரையிறுதியில் போபண்ணா: ஆடவா் இரட்டையா் பிரிவில், போட்டித்தரவரிசையில் 2-ஆம் இடத்திலிருக்கும் இந்தியாவின் ரோஹன் போபண்ணா/ஆஸ்திரேலியாவின் மேத்யூ எப்தென் கூட்டணி 6-2, 6-7 (4/7), 10-7 என்ற செட்களில் கொலம்பியாவின் நிகோலஸ் பரியென்டோஸ்/பிரேஸிலின் ரஃபேல் மேடோஸ் இணையை வீழ்த்தி அரையிறுதிக்கு வந்தது.