28 ஆண்டுகளுக்குப் பிறகு இறுதிக்கு முன்னேறிய ஆர்சி லென்ஸ்..! கால்பந்து திடலில் குவிந்த ரசிகர்கள்!

பிரான்ஸில் நடைபெறும் பிரான்ஸ் கோப்பை (பிரெஞ்சு கோப்பை) அரையிறுதியில் ஆர்சி லென்ஸ் அணி 4 -1 என துலூஸ் அணியை வீழ்த்தியது.

மூன்று முறை இறுதிப் போட்டியில் தோல்வியுற்ற ஆர்சி அணி முதல்முறையாக கோப்பையை வெல்லுமா என்ற எதிர்பார்ப்பு அந்த அணியின் ரசிகர்கள் மத்தியில் உருவாகியுள்ளது.

ரேசிங் கிளப் டி லென்ஸ் எனப்படும் ஆர்சி லென்ஸ் அணி இன்னும் ஒரு பிரான்ஸ் கோப்பையைக் கூட வெல்லாமல் இருக்கிறது. முன்னதாக, 1947-48, 1974-75, 1997-98 சீசனில் இறுதிப் போட்டியில் ஆர்சி லென்ஸ் அணி தோல்வியுற்றது.

அரையிறுதியில் ஆர்சி லென்ஸ் அணி சார்பில் 9,18, 35, 74ஆவது நிமிஷத்தில் கோல் அடித்து அசத்தினார்கள். துலூஸ் அணி சார்பில் 21ஆவது நிமிஷத்தில் ஆறுதல் கோல் அடிக்கப்பட்டது.

ஆதிக்கத்துடன் இறுதிப் போட்டிக்கு முன்னேறிய ஆர்சி லென்ஸ் அணி இறுதிப் போட்டியில் ஸ்ட்ராஸ்பர்க் அல்லது நைஸ் ஆகிய அணிகளில் எதாவது ஒன்றுடன் மோதவிருக்கிறது.

சுமார் 28 ஆண்டுகளுக்குப் பிறகு இறுதிப் போட்டிக்கு முன்னேறியதால் இந்த அணியின் ரசிகர்கள் திடலுக்குள் குவிந்தார்கள். இந்தக் காட்சிகள் இணையத்தில் வைரலாகி வருகின்றன.