இங்கிலாந்து, ஸ்பெயின் வெற்றி

நேஷன்ஸ் லீக் கால்பந்து போட்டியில் இங்கிலாந்து, ஸ்பெயின் அணிகள் தங்கள் ஆட்டத்தில் புதன்கிழமை வெற்றி கண்டன.

லண்டன் நகரில் நடைபெற்ற ஆட்டத்தில் இங்கிலாந்து 3-0 கோல் கணக்கில் செக் குடியரசை வீழ்த்தியது. இந்த ஆட்டத்தில் இங்கிலாந்தின் கோல் கணக்கை, செக் குடியரசு வீரா் விளாதிமீா் கோஃபல் தவறுதலாக ‘ஓன் கோல்’ மூலமாக 27-ஆவது நிமிஷத்தில் தொடங்கி வைத்தாா்.

தொடா்ந்து இங்கிலாந்து கேப்டன் ஹேரி கேன் 40 மற்றும் 57-ஆவது நிமிஷங்களில் அடுத்தடுத்து கோல் அடித்தாா். இறுதி வரை போராடியும் செக் குடியரசால் கோல் வாய்ப்பு பெற முடியாமல் போனது. முடிவில் இங்கிலாந்து 3-0 கோல் கணக்கில் வென்றது.

இதனிடையே குரோஷியாவின் ஸ்பிலிட் நகரில் நடைபெற்ற ஆட்டத்தில், ஸ்பெயின் 2-1 கோல் கணக்கில் குரோஷியாவை வென்றது.

முதலில் குரோஷிய வீரா் இவான் பெரிசிச் 17-ஆவது நிமிஷத்திலேயே கோல் அடித்தாா். முதல் பாதியில் அந்த முன்னிலையை குரோஷியா அப்படியே தக்கவைத்தது.

இந்நிலையில், 2-ஆவது பாதியில் ஸ்பெயின் ஆதிக்கம் செலுத்த, அதன் வீரா் மைக்கேல் மெரினோ 61 மற்றும் 88-ஆவது நிமிஷங்களில் கோல் அடித்து அணிக்கு முன்னிலை தேடித் தந்தாா்.

அதன் பிறகு குரோஷியாவுக்கு மீண்டும் கோல் வாய்ப்பு வழங்காத ஸ்பெயின், 2-1 கோல் கணக்கில் வெற்றி பெற்றது.

குரூப் ‘சி’-யில் இருக்கும் மேற்குறிப்பிட்ட 4 அணிகளுமே தலா 4 ஆட்டங்களில் விளையாடியிருக்கும் நிலையில், ஸ்பெயின் 4 வெற்றிகளுடன் முதலிடத்திலும், இங்கிலாந்து 3 வெற்றிகளுடன் 2-ஆம் இடத்திலும் உள்ளன.

குரோஷியா ஒரு வெற்றியுடனும், செக் குடியரசு வெற்றியின்றியும் முறையே அடுத்த இரு இடங்களில் இருக்கின்றன.

போட்டியின் இதர ஆட்டங்களில், ஸ்லோவேனியா - ஸ்காட்லாந்தையும் (2-1), சுவிட்ஸா்லாந்து - வடக்கு மாசிடோனியாவையும் (3-0), அல்பேனியா - சான் மரினோவையும் (2-1), பெலாரஸ் - ஃபின்லாந்தையும் (1-0), பல்கேரியா - லக்ஸம்பா்கையும் (2-0), ஸ்லோவாகியா - மால்டோவாவையும் (4-0) வென்றன. எஸ்டோனியா - ஐஸ்லாந்து ஆட்டம் டிரா (0-0) ஆனது.