ரயில் தண்டவாளத்தில் திடீர் விரிசல்: பயணிகள் அதிர்ஷ்டவசமாக உயிர் தப்பினர்

சென்னையில் இருந்து திருச்சி வழியாக வரும் ரயில் தண்டவாளத்தில் திடீர் விரிசல் ஏற்பட்டதால் பயணிகள் அதிர்ஷ்டவசமாக உயிர்தப்பினர்.

திருச்சி வழியாக அனந்தபுரி எக்ஸ்பிரஸ் நேற்றிரவு புறப்பட்டு வந்து கொண்டிருந்தது. இன்று அதிகாலை 3 மணிக்கு மாத்தூர்–செந்துறை இடையே வந்தபோது தண்டவாளத்தில் விரிசல் ஏற்பட்டிருப்பதை என்ஜின் டிரைவர் கண்டுபிடித்தார். இதையடுத்து ரயிலை உடனடியாக நிறுத்தி இது குறித்து திருச்சி ஜங்ஷன் ரெயில் நிலைய அதிகாரிகளுக்கு தகவல் தெரிவிக்கப்பட்டது. விரிசல் ஏற்பட்ட இடத்தை அதிகாரிகள் ஆய்வு செய்தனர். அப்போது தண்டவாளங்களை இணைக்கும் பகுதியில் உள்ள வெல்டிங் விரிசல் அடைந்து தண்டவாளம் விலகியிருந்தது தெரிய வந்தது. உடனே அவற்றை சரி செய்யும் பணியில் ஊழியர்கள் ஈடுபட்டனர்.

ரயில் நீண்ட நேரம் நடுவழியில் நிற்பதை பார்த்ததும் தூக்கத்தில் இருந்து எழுந்த பயணிகள் விரிசல் குறித்த தகவல் அறிந்து அதிர்ச்சி அடைந்தனர். அனந்தபுரி எக்ஸ்பிரஸ் ரயிலை தொடர்ந்து திருச்சிக்கு சென்னையில் இருந்து புறப்பட்டு வந்த மலைக்கோட்டை எக்ஸ்பிரஸ் ரயிலும் மாத்தூர் அருகே வந்ததும் நிறுத்தி வைக்கப்பட்டது. தண்டவாளம் சரி செய்யும் பணி முடிந்ததும் 5.30 மணிக்கு அனந்தபுரி எக்ஸ்பிரஸ் ரெயில் அங்கிருந்து புறப்பட்டு திருச்சி ஜங்ஷன் வந்தடைந்தது.