போளூர் அருகே சூறைக் காற்று: 10,000 வாழைகள் சேதம்

போளூரை அடுத்த படவேடு பகுதியில் சனிக்கிழமை அதிகாலை வீசிய சூறைக் காற்றுக்கு 10 ஆயிரம் வாழை மரங்கள் சேதமடைந்தன.

போளூரை அடுத்த படவேடு ஊராட்சியைச் சேர்ந்த மல்லிகாபுரம், மங்களாபுரம், தேவனாங்குளம், ராமநாதபுரம் ஆகிய கிராமங்களில் விவசாயிகள் வாழை பயிரிட்டு வளர்த்து வருகின்றனர். இவை தற்போது குலை தள்ளியுள்ளன.

இந்த நிலையில் சனிக்கிழமை அதிகாலை மழையுடன் சூறைக் காற்று வீசியது. இதில் 10 ஆயிரத்துக்கும் மேற்பட்ட வாழை மரங்கள் சாய்ந்தன.

இதையடுத்து தங்களுக்கு அரசு நிவாரணம் வழங்க வேண்டும் என கிராம நிர்வாக அலுவலரிடம் சுமார் 20-க்கும் மேற்பட்ட விவசாயிகள் மனு அளித்தனர். வருவாய்த் துறையினரும், வேளாண்மைத் துறையைச் சேர்ந்த தோட்டகலைத் துறையினரும் வாழையின் சேதம் குறித்து கணக்கீடு செய்து வருகின்றனர்.