நிதி நிறுவன மோசடி: தேவநாதன் யாதவ் கைது

மயிலாப்பூர் இந்து நிதி நிறுவன மோசடி வழக்கில் மக்கள் கல்வி முன்னேற்றக் கழகத் தலைவர் டி. தேவநாதன் யாதவ் செவ்வாய்க்கிழமை கைது செய்யப்பட்டார்.

சென்னை மயிலாப்பூரில் உள்ள இந்து நிதி நிறுவனம் ரூ. 525 கோடிக்கு மேல் மோசடி செய்ததாக பொருளாதார குற்றப்பிரிவு அலுவலகத்தில் 140-க்கும் மேற்பட்டோர் புகார் அளித்தனர்.

தொடர்ந்து, அந்த நிறுவனத்தின் தலைவர் தேவநாதன் யாதவ் மீது புகார்கள் வந்ததால் வழக்குப்பதிவு செய்யப்பட்டு விசாரணை மேற்கொள்ளப்பட்டது.

முதற்கட்டமாக தேவநாதனை கைது செய்து விசாரணை நடத்த காவல்துறையினர் திட்டமிட்ட நிலையில், அவர் தலைமறைவானார். அவரின் செல்போன் டவர் மூலம் திருச்சி அருகே இருப்பது கண்டறியப்பட்டது.

இதனைத் தொடர்ந்து, திருச்சி விரைந்த பொருளாதார குற்றப்பிரிவு காவல்துறையினர் தேவநாதனை கைது செய்து சென்னை அழைத்து வரவுள்ளனர்.

சென்னையில் விசாரணை நடத்திய பிறகு நீதிமன்றத்தில் ஆஜர்படுத்தப்பட்டு புழல் சிறையில் அடைக்கவுள்ளதாக கூறப்படுகிறது.

சமீபத்தில் நடைபெற்ற மக்களவைத் தேர்தலில் தேசிய ஜனநாயகக் கூட்டணியில் பாஜக வேட்பாளராக சிவகங்கையில் வேதநாதன் யாதவ் போட்டியிட்டிருந்தார்.

தேர்தலில் போட்டியிட தேவநாதன் யாதவ் தாக்கல் செய்த வேட்புமனுவில் தனது குடும்பத்தின் சொத்து மதிப்பு ரூ.305 கோடி எனத் தெரிவித்திருந்தது குறிப்பிடத்தக்கது.