திண்டுக்கல்: வேன் மோதி 4 சிறார்கள் பலி!

வடமதுரை அருகே ஆடு மேய்த்துக் கொண்டிருந்த பெற்றோருடன் சாலையில் விளையாடிக் கொண்டிருந்த சிறுவர், சிறுமியர் 4 பேர் வேன் மோதிய விபத்தில் பலியாகினர்.

திண்டுக்கல் மாவட்டம் வடமதுரை கொல்லப்பட்டியைச் சேர்ந்த பழனிச்சாமி என்பவரது மனைவி அஞ்சம்மாள்(60). கொல்லப்பட்டி சமத்துவபுரம், கணவாய் மேடு பகுதியில் ஞாயிற்றுக்கிழமை பிற்பகல் ஆடு மேய்த்துக் கொண்டிருந்தார்.

அப்போது அவரது உறவினர்களின் குழந்தைகளான நாகராஜ் என்பவரது மகள்கள் யோகவர்ஷினி(11), அனன்யா(6), ஜெகதீசன் என்பவரது மகள் தனுஸ்ரீ(5), சின்னத்தம்பி என்பவரது மகன் மோசிகரன்(6) உள்ளிட்டோர் சாலையோரமாக விளையாடிக் கொண்டிருந்தனர்.

அப்போது அந்த வழியாக சென்ற பால் வேன், சிறுவர், சிறுமிகள் மீது மோதி விபத்துக்குள்ளானது. இதில் பலத்த காயமடைந்த 4 பேரும் நிகழ்விடத்திலேயே பலியாகினர். இதனைப் பார்த்த அஞ்சம்மாள், அதிர்ச்சியில் மயக்கமடைந்தார்.

இதுகுறித்து தகவல் அறிந்த வடமதுரை போலீஸார், சிறுவர், சிறுமிகளின் உடல்களை மீட்டு கூறாய்வுகாக திண்டுக்கல் அரசு மருத்துக் கல்லூரி மருத்துவமனைக்கு அனுப்பி வைத்தனர். கொல்லப்பட்டி பகுதியில் நிகழ்ந்த இந்த கோர விபத்து சிறுவர், சிறுமியர்களின் உறவினர் மட்டுமின்றி பொதுமக்கள் மத்தியிலும் அதிர்ச்சியை ஏற்படுத்தி இருக்கிறது.