சி.வி. சண்முகம் வெற்றியை எதிர்த்த வழக்கு தள்ளுபடி!

அதிமுக எம்.எல்.ஏ. சி.வி. சண்முகத்தின் வெற்றியை எதிர்த்த வழக்கை சென்னை உயர் நீதிமன்றம் தள்ளுபடி செய்து செவ்வாய்க்கிழமை உத்தரவிட்டுள்ளது.

விழுப்புரம் மாவட்டம், மைலம் சட்டப்பேரவைத் தொகுதியில் அதிமுக சார்பில் போட்டியிட்டு, 30,041 வாக்குகள் வித்தியாசத்தில் சி.வி.சண்முகம் வெற்றி பெற்றிருந்தார்.

இந்த நிலையில், சி.வி. சண்முகத்தின் வெற்றியை எதிர்த்து மைலம் தொகுதி வாக்காளர் கமலக்கண்ணன் என்பவர் சென்னை உயர் நீதிமன்றத்தில் வழக்கு தொடர்ந்திருந்தார்.

இந்த வழக்கை நிராகரிக்கக் கோரி சி.வி. சண்முகம் தரப்பில் சென்னை உயர் நீதிமன்றத்தில் கோரிக்கை வைக்கப்பட்டிருந்தது.

இந்த நிலையில், வழக்கை விசாரித்த நீதிபதி ஜி.கே. இளந்திரையன் அமர்வு, சி.வி. சண்முகத்தின் கோரிக்கையை ஏற்று, கமலக்கண்ணன் தாக்கல் செய்த மனுவைத் தள்ளுபடி செய்தார்.