காலை உணவில் பல்லி: வாந்தி, மயக்கத்துடன் 40 மாணவர்கள் மருத்துவமனையில் அனுமதி!

திருவள்ளூர்: திருவள்ளூர் அருகே அரசு நடுநிலைப்பள்ளியில் இன்று காலை சிற்றுண்டியில் பல்லி விழுந்த உணவை உள்கொண்ட மாணவ, மாணவிகள் 40 பேருக்கு வாந்தி மயக்கம் ஏற்பட்டதைத் தொடர்ந்து அரசு மருத்துவமனையில் தீவிர சிகிச்சை பெற்று வருவதை ஆட்சியர் ச. கவிதா நேரில் பார்வையிட்டு ஆய்வு செய்தார்.

திருவள்ளூர் அடுத்த கடம்பத்தூர் ஊராட்சி ஒன்றியம், கொட்டையூரில் அரசினர் நடுநிலைப் பள்ளி செயல்பட்டு வருகிறது. இப்பள்ளியில் மாணவ, மாணவிகள் 54 பேர் பயின்று வருகின்றனர். இந்த மாணவர்களுக்கு இன்று காலை 8.30 மணிக்கு மேல் கோதுமை ரவா கிச்சடியும், சாம்பாரும் காலை சிற்றுண்டியாக வழங்கப்பட்டது. அப்போது சாப்பிடும்போது ரவா கிச்சடியில் பல்லி இருப்பதைக் கண்டு மாணவ, மாணவிகள் அதிர்ச்சி அடைந்தனர்.

அதைத்தொடர்ந்து காலை உணவை சாப்பிட்ட 40 மாணவ, மாணவிகளுக்கு பயத்தில் வாந்தி, மயக்கம் ஏற்பட்டது. இதையடுத்து மூன்று அவசர வாகனங்கள் மூலம் திருவள்ளூர் மாவட்ட அரசு மருத்துவக் கல்லூரி மருத்துவமனைக்கு சிகிச்சைக்காக கொண்டு வந்து சேர்த்தனர். இதில் முழு உணவையும் சாப்பிட்ட 18 பேருக்கு தீவிர சிகிச்சையும் மற்ற மாணவ, மாணவிகளுக்கு சிகிச்சையும் அளிக்கப்பட்டு வருகிறது.

இதுகுறித்து தகவல் அறிந்த திருவள்ளூர் ஆட்சியர் ச. கவிதா, அரசு மருத்துவக் கல்லூரி மருத்துவமனைக்கு நேரில் சென்று பள்ளி மாணவ, மாணவிகளிடம் நலம் விசாரித்தார். அதையடுத்து பயப்படத் தேவையில்லை என்றும் ஆறுதல் கூறினார்.

பின்னர் இதுதொடர்பாக அவர் கூறியதாவது:

தற்போதைய நிலையில் மாணவ, மாணவிகள் நலமுடன் இருக்கின்றனர். பெற்றோர்கள் யாரும் அச்சப்பட தேவையில்லை. இதில் சமையலரின் கவனக்குறைவுதான் கராணம் என கண்டறியப்பட்டுள்ளது. சமைக்கும்போது பள்ளி ஆசிரியர்களும் பார்த்து ஆய்வு செய்யவும் அறிவுறுத்தப்பட்டுள்ளனர். உணவு பாதுகாப்புத் துறையினரை ஆய்வு செய்ய அனுப்பியிருக்கிறோம். சமைத்த உணவை மாதிரி (sample) எடுத்து வைக்க உத்தரவிட்டிருப்பதால் அதனையும் ஆய்வு செய்ய இருப்பதாகவும் அவர் தெரிவித்தார்.

அப்போது, மருத்துவக் கல்லூரி மருத்துவமனை முதன்மையர் ஜி. பாலாஜி மற்றும் கல்வி அதிகாரிகள், மருத்துவர்கள் உடனிருந்தனர்.

இந்த நிலையில் பல்லி விழுந்த காலை உணவை சாப்பிட்ட பள்ளி மாணவர்களுக்கு வாந்தி, மயக்கம் ஏற்பட்டு மருத்துவமனையில் அனுமதிக்கப்பட்ட சம்பவம் அந்தப்பகுதியில் பெரும் பரபரப்பை ஏற்படுத்தியது.