வா்ணம் மாறிய எம்எல்ஏ பெயா்

தென்காசி மாவட்டம் கடையநல்லூா் சட்டப்பேரவை உறுப்பினா் அலுவலக சுவரில் மதிமுக வா்ணத்தில் பெரிய எழுத்தில் எழுதப்பட்டிருந்த எம்எல்ஏவின் பெயா் திமுக வா்ணத்தில் மாற்றி எழுதப்பட்டது.

கடையநல்லூா் சட்டப்பேரவை தொகுதிக்கான தோ்தலில் மதிமுக சாா்பில் அதன் துணைப் பொதுச் செயலரான தி.மு. ராசேந்திரன், மதச்சாா்பற்ற கூட்டணியில் திமுகவின் உதயசூரியன் சின்னத்தில் போட்டியிட்டு வெற்றி பெற்றாா்.

அதைத்தொடா்ந்து, கடையநல்லூா் சட்டப்பேரவை உறுப்பினா் அலுவலகம் புனரமைக்கப்பட்டது. அக்கட்டடத்தை துரை வைகோ எம்.பி. திறந்து வைத்தாா். கட்டடத்தின் வெளிப்புறச் சுவரில் மிகப்பெரிய அளவில் மதிமுக கொடியின் வண்ணத்தில் தி.மு. ராஜேந்திரனின் பெயா் எழுதப்பட்டது.

இந்நிலையில், சில நாள்களுக்கு முன்பு சென்னையில் செய்தியாளா்களை சந்தித்த தி.மு. ராசேந்திரன், தான் திமுக எம்எல்ஏவாக தொடா்வதாக தெரிவித்தாா்.

மேலும், கடையநல்லூா் எம்எல்ஏ அலுவலகத்தில் அவரது பெயா் திமுக வண்ணத்தில் மாற்றி எழுதப்பட்டது. இது, அக்கட்சியினா் மத்தியில் மகிழ்ச்சியை ஏற்படுத்தியுள்ளது.