நாட்டின் முன்னணி வாகன உற்பத்தி நிறுவனங்களில் ஒன்றான டாடா மோட்டாா்ஸின் மொத்த விற்பனை கடந்த மே மாதத்தில் 9 சதவீதம் சரிவைக் கண்டுள்ளது.

இது குறித்து நிறுவனம் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

கடந்த மே மாதத்தில் நிறுவனத்தின் மொத்த விற்பனை 70,187-ஆகப் பதிவாகியுள்ளது. முந்தைய 2024-ஆம் ஆண்டின் இதே மாதத்துடன் ஒப்பிடுகையில் இது 9 சதவீதம் குறைவு. அப்போது நிறுவனம் 76,766 வாகனங்களை சில்லறை விற்பனையாளா்களுக்கு அனுப்பியிருந்தது.

2024 மே மாதத்தில் 75,173-ஆக இருந்த நிறுவனத்தின் உள்நாட்டு விற்பனை இந்த மே மாதத்தில் 10 சதவீதம் சரிந்து 67,429-ஆக உள்ளது.

மதிப்பீட்டு மாதத்தில் மின்சார வாகனங்கள் உள்ளிட்ட நிறுவன பயணிகள் வாகனங்களின் விற்பனை 11 சதவீதம் குறைந்து 42,040-ஆக உள்ளது. வா்த்தக வாகனங்களின் விற்பனை 29,691-லிருந்து 5 சதவீதம் குறைந்து 28,147-ஆக உள்ளது என்று அந்த அறிக்கையில் குறிப்பிடப்பட்டுள்ளது.