ஏப்ரல் - ஜூன் காலாண்டில் ஓஎன்ஜிசி லாபம் ரூ. 17,034 கோடி

பொதுத் துறை நிறுவனமான எண்ணெய் மற்றும் இயற்கை எரிவாயு கழகம் (ஓஎன்ஜிசி), நடப்பு 2026-27 நிதியாண்டின் ஏப்ரல்-ஜூன் காலாண்டில் ரூ.17,033.81 கோடி நிகர லாபத்தைப் பதிவு செய்துள்ளது.

கடந்த 2025-26 நிதியாண்டின் இதே காலாண்டில் நிறுவனம் ஈட்டிய ரூ.8,024.23 கோடியில் இருந்து, இது இரட்டிப்பு வளா்ச்சியாகும். கச்சா எண்ணெய் விலையுயா்வு மற்றும் புதிய எரிவாயு கிணறுகள் மூலமாகக் கிடைத்த கூடுதல் வருவாயும் இதற்குக் காரணமாக தெரிவிக்கப்பட்டுள்ளது.

அதேபோல், நிறுவனத்தின் மொத்த வருவாய் முந்தைய ஆண்டின் ரூ.33,213.39 கோடியிலிருந்து, மதிப்பீட்டு காலாண்டில் ரூ.48,321.65 கோடியாக உயா்ந்துள்ளது. வரிக்கு முந்தைய லாபம் காலாண்டு அளவில் முன்னெப்போதும் இல்லாத வகையில் ரூ.22,848 கோடியை எட்டியுள்ளது.

நிதிநிலையில் சாதனை படைத்திருந்தாலும், கச்சா எண்ணெய் மற்றும் இயற்கை எரிவாயு உற்பத்தி இக்காலாண்டில் சற்று சரிவைக் கண்டுள்ளது. கச்சா எண்ணெய் உற்பத்தி 46.8 லட்சம் டன்னிலிருந்து 44.5 லட்சம் டன்னாகவும், இயற்கை எரிவாயு உற்பத்தி 485 கோடி கன மீட்டரிலிருந்து 476 கோடி கன மீட்டராகவும் குறைந்துள்ளது.

அடுத்த நிதியாண்டு முதல் உற்பத்தியைப் பெருக்கும் நோக்கில் மேற்கு கடலோரப் பகுதிகளில் ரூ.40,000 கோடிக்கும் மேலான மூலதனத் திட்டங்களைச் செயல்படுத்தி வருவதாக ஓஎன்ஜிசி தெரிவித்துள்ளது.