இலங்கையில் நிலச்சரிவு: 7 பேர் சாவு

இலங்கையில் பெய்த பலத்த மழை காரணமாக ஏற்பட்ட நிலச்சரிவில் சிக்கி 7 பேர் உயிரிழந்தனர். 180 பேர் வீடுகளை இழந்தனர்.

இதுகுறித்து அதிகாரிகள் கூறுவதாவது:

இலங்கையில் தமிழர்கள் அதிகம் வசிக்கும் மத்திய மாகாணமான நுவரெலியாவின் கொத்மலை நகரில் வெள்ளிக்கிழமை நிலச்சரிவு ஏற்பட்டது. இதில் 2 வயதுக் குழந்தை உள்பட 7 பேர் உயிரிழந்தனர். ஏராளமான வீடுகள் மணலுக்குள் புதையுண்டன.

வீடுகளை இழந்த 180 பேர் தாற்காலிக முகாம்களில் தங்க வைக்கப்பட்டுள்ளனர். தொடர்ந்து பெய்து வரும் பலத்த மழையால் இலங்கையின் பெரும்பாலான பகுதிகள் பாதிக்கப்பட்டுள்ளன. ஒரு சில இடங்களில் 100 மி.மீ வரை மழை பெய்யும் என எதிர்பார்க்கப்படுகிறது. தலைநகர் கொழும்பில் ஏராளமான முக்கியச் சாலைகள் வெள்ளத்தில் மூழ்கியுள்ளன என அதிகாரிகள் தெரிவித்தனர்.