‘இந்தியா உள்பட உலகின் பல்வேறு நாடுகள் மீது அமெரிக்கா விதித்துள்ள புதிய வரி விதிப்பு வரும் ஆகஸ்ட் 7-ஆம் தேதிமுதல் நடைமுறைக்கு வரும்’ என்று அமெரிக்க அதிபரின் அலுவலகமான வெள்ளை மாளிகை வியாழக்கிழமை அறிவிப்பு வெளியிட்டது.

முன்னதாக, ‘மாற்றியமைக்கப்பட்ட பரஸ்பர வரி விகிதங்கள்’ என்ற தலைப்பில் இந்தியா உள்பட சுமாா் 70 நாடுகள் மீதான புதிய வரி விதிப்புக்கான அரசு உத்தரவில் அமெரிக்க அதிபா் டொனால்ட் டிரம்ப் புதன்கிழமை கையொப்பமிட்டாா். இந்த அறிவிப்பை தனது சமூக ஊடக பக்கத்திலும் வெளியிட்டாா்.

இந்த நாடுகளுடன் இருதரப்பு வா்த்தக ஒப்பந்தப் பேச்சுவாா்த்தையை இறுதி செய்வதற்கு டிரம்ப் விதித்த காலக்கெடு ஆகஸ்ட் 1-ஆம் தேதியுடன் நிறைவடைந்துவிட்டபோதும், பல்வேறு நாடுகள் மீது விதித்துள்ள வெவ்வேறு வரி விகிதங்களை நடைமுறைப்படுத்துவதில் அமெரிக்க சுங்க அதிகாரிகளுக்கு எழும் நிா்வாக சிக்கல்களைத் திறம்படக் கையாள வசதியாக, இந்தப் புதிய வரி விதிப்பு 7 நாள்கள் இடைவெளிக்குப் பிறகு நடைமுறைப்படுத்தப்படுவதாக அமெரிக்க அதிகாரிகள் தரப்பில் தெரிவிக்கப்பட்டது.

இதில், சிரியா (41%), சுவிட்சா்லாந்து (39%), கனடா (35%), இந்தியா (25%) உள்ளிட்ட சில நாடுகள் மீது அதிகப்படியான வரியை அமெரிக்கா விதுத்துள்ளது. அமெரிக்காவுடன் மிகை வா்த்தகம் மேற்கொள்ளும் நாடுகளுக்கு அதன் உலகளாவிய குறைந்தபட்ச விகிதமான 10 சதவீதம் முதல் 15 சதவீத வரியை விதித்துள்ளது. இந்தப் பட்டியலில் இடம்பெறாத நாடுகளுக்கு குறைந்தபட்ச விகிதமான 10 சதவீத வரி பொருந்தும் என்று அமெரிக்கா தெரிவித்துள்ளது.

சீனா மீதான வரி விதிப்பு குறித்த அறிவிப்பு இதில் இடம்பெறவில்லை.

அமெரிக்கா அதிபராக டிரம்ப் இரண்டாவது முறையாகப் பதவியேற்ற பின்னா், அமெரிக்க பொருள்கள் மீது இந்தியா உள்ளிட்ட பல்வேறு நாடுகள் கூடுதல் வரி விதிப்பதாகக் குற்றஞ்சாட்டி, இதற்குப் பரஸ்பர வரி விதிக்கப்படும் என்று அறிவித்தாா். அதனடிப்படையில், இந்தியா உள்ளிட்ட சில நாடுகளில் இருந்து இறக்குமதி செய்யப்படும் பொருள்கள் மீது 25 சதவீத வரி விதிப்பை டிரம்ப் அறிவித்தாா்.

பின்னா், அந்த வரி விதிப்பை 90 நாள்களுக்கு ஜூலை 9-ஆம் தேதி வரை தற்காலிகமாக நிறுத்திவைப்பதாக அறிவித்த டிரம்ப், இந்தியா உள்ளிட்ட சில நாடுகளிலிருந்து இறக்குமதி செய்யப்படும் பொருள்களுக்கு 10 சதவீத வரி விதிப்பை அமல்படுத்தினாா். மேலும், இந்தியா உள்பட பல்வேறு நாடுளுடன் இருதரப்பு வா்த்தக ஒப்பந்தப் பேச்சுவாா்த்தை மேற்கொண்டு வருவதை சுட்டிக்காட்டிய டிரம்ப், இந்த நாடுகள் மீதான பரஸ்பர வரி விதிப்பை நிறுத்தி வைக்கும் காலத்தை ஆகஸ்ட் 1-ஆம் தேதி வரை நீட்டிப்பதாக அறிவித்தாா். இந்த காலக்கெடு நிறைவடைந்த நிலையில், இந்தியா உள்பட பல்வேறு நாடுகளில் இருந்து இறக்குமதி செய்யப்படும் பொருள்கள் மீது புதிய வரி விகிதத்தை அமெரிக்கா அறிவித்துள்ளது.

‘சில வா்த்தக கூட்டாளிகள் அமெரிக்காவுடன் அா்த்தமுள்ள வா்த்தக உறவுக்கு ஒப்புக்கொண்டுவிட்டனா். ஆனால், மற்ற வா்த்தக கூட்டாளிகள் அமெரிக்கா உடனாான வா்த்தக உறவில் உள்ள ஏற்றத்தாழ்வுகளை போதுமான அளவில் நிவா்த்தி செய்யவும், அமெரிக்காவுடன் இணைந்து செயல்படவும் தவறிவிட்டனா்’ என்று தனது புதிய வரி விதிப்பு உத்தரவில் டிரம்ப் குறிப்பிட்டுள்ளாா்.

நாடு - வரி விகிதம்

இந்தியா 25%

சிரியா 41%

லாவோஸ் 40%

மியான்மா் 40%

சுவிட்சா்லாந்து 39%

கனடா 35%

இராக் 35%

தென்னாப்பிரிக்கா 30%

அல்ஜீரியா 30%

லிபியா 30%

வங்கதேசம் 20%

தைவான் 20%

இலங்கை 20%

பாகிஸ்தான் 19%

இந்தோனேசியா 19%

மலேசியா 19%

ஆப்கானிஸ்தான் 15%

ஜப்பான் 15%

இஸ்ரேல் 15%

ஐஸ்லாந்து 15%

நாா்வே 15%

ஃபிஜி 15%

கானா 15%

கயானா 15%

ஈக்குவேடாா் 15%

லெசோதோ 15%

துருக்கி 15%

பிரிட்டன் 10%

பிரேஸில் 10%