மாவட்டந்தோறும் நவயோதயா பள்ளிகளை தொடங்க வலியுறுத்தல்

கிராமப் பகுதிகளில் உள்ள மாணவர்களின் கல்வி சிறக்கும் வகையில் மாவட்டந்தோறும் நவயோதயா பள்ளிகளைத் தொடங்க வேண்டும் என தேசிய ஆசிரியர் சங்க மாநில செயற்குழுக் கூட்டத்தில் தீர்மானம் நிறைவேற்றப்பட்டது.
திருவள்ளூர் நிகேதன் மேல்நிலைப் பள்ளி வளாகத்தில் தேசிய ஆசிரியர் சங்கத்தின், மாநில செயற்குழுக் கூட்டம் செவ்வாய்க்கிழமை நடைபெற்றன. கூட்டத்துக்கு, சங்கத்தின் தலைவர் திரிலோகசந்திரன் தலைமை வகித்தார். சங்கத்தின் பொதுச்செயலாளர் கந்தசாமி முன்னிலை வகித்தார். இதில், ஆரம்பக் கல்வியை கட்டாயம் தாய்மொழியிலேயே கற்பிக்க வேண்டும். கிராமப் பகுதி மாணவர்களின் கல்வி சிறக்க மாவட்டந்தோறும் நவயோதயா பள்ளிகளைத் தொடங்க வேண்டும். 
மேலும், 6,7,8 வகுப்புகளில் கட்டாயத் தேர்ச்சி முறையை ரத்து செய்தல், அனைவருக்கும் கல்வி இயக்க பயிற்றுநர்களின் இடமாறுதல் கலந்தாய்வு விரைவில் நடத்த வேண்டும் என்பன உள்பட பல்வேறு தீர்மானங்கள் நிறைவேற்றப்பட்டன. 
கூட்டத்தில், மாநில, மாவட்ட நிர்வாகிகள் அனைவரும் கலந்து கொண்டனர். இதற்கான ஏற்பாடுகளை சங்கத்தின் திருவள்ளூர் மாவட்ட நிர்வாகிகள் செய்திருந்தனர்.