பரமனந்தலில் மனுநீதி நாள் முகாம்

செங்கத்தை அடுத்த பரமனந்தல் கிராமத்தில் புதன்கிழமை நடைபெற்ற மனுநீதி நாள் முகாமில் 128 பேருக்கு நலத் திட்ட உதவிகள் வழங்கப்பட்டன.
முகாமுக்கு திருவண்ணாமலை கோட்டாட்சியர் தங்கவேல் தலைமை வகித்தார். வட்டாட்சியர் ரேணுகா முன்னிலை வகித்தார். வருவாய் ஆய்வாளர் ராஜேந்திரன் வரவேற்றார்.
சிறப்பு அழைப்பாளராக துணை ஆட்சியர் (பயிற்சி) பிரதாப் கலந்துகொண்டு, 128 பயனாளிகளுக்கு முதியோர் உதவித்தொகை, புதிய குடும்ப அட்டை, இலவச வீட்டுமனைப் பட்டா, தையல் இயந்திரம் உள்ளிட்ட நலத் திட்ட உதவிகளை வழங்கினார்.
மேலும், திருவண்ணாமலை மாவட்டத்தில் வரும்15-ஆம் தேதி முதல் பிளாஸ்டிக் பொருள்களை பயன்படுத்த தடை விதிக்கப்பட்டுள்ளதால், அதற்கு பொதுமக்கள் ஒத்துழைப்பு அளிக்க வேண்டும் என அவர் வலியுறுத்தினார்.
இதில், கிராம நிர்வாக அலுவலர்கள் விஜயகுமார், பத்மா, சத்யா உள்பட பலர் கலந்து கொண்டனர்.