குப்பைக் கிடங்கில் தொடரும் தீ விபத்து: சுற்றுச்சூழல் மாசு ஏற்படுவதாக குற்றச்சாட்டு

திருப்பத்தூரில் உள்ள குப்பைக் கிடங்கில் அடிக்கடி தீப்பற்றி எரிவதால் மாசு ஏற்படுவதாக பொதுமக்கள் குற்றம்சாட்டுகின்றனர்.
திருப்பத்தூரில் ஆங்காங்கே கொட்டப்படும் குப்பைகளால் ஏற்படும் பாதிப்பு குறித்து கடந்த ஆகஸ்ட் மாதம் தினமணியில் புகைப்படத்துடன் செய்தி வெளியானது. 
இதையடுத்து திடக்கழிவு மேலாண்மை திட்டத்தின் கீழ் பஉச நகரில் உள்ள குப்பைக் கிடங்கையொட்டி, சுமார் 13 ஆயிரம் சதுரஅடி பரப்பளவில் குப்பைகள் தரம் பிரிப்பு மையம் கட்டப்பட்டு வருகிறது. மேலும், மக்கும் மற்றும் மக்காத குப்பைகளில் இருந்து உரம் தயாரிக்கும் பணி தொடங்கப்பட்டுள்ளது.
திருப்பத்தூர் நகரப் பகுதிகளில் இருந்து மட்டும் நாள் ஒன்றுக்கு சுமார் 36 டன் குப்பைகள் சேகரிக்கப்படுகின்றன.
 இதைக் குறைக்கும் வகையில் 5 ஆயிரம் சதுர அடி பரப்பளவு கொண்ட குடியிருப்புகளில் உள்ளவர்கள் அவர்களாகவே குப்பைகளைத் தரம் பிரித்து நகராட்சி துப்புரவுப் பணியாளர்களிடம் வழங்க வேண்டும் என தற்போது அறிவிக்கப்பட்டுள்ளது. இந்நிலையில், இந்தக் குப்பைக் கிடங்கில் மர்ம நபர்களால் தீ வைக்கும் சம்பவங்கள் அடிக்கடி ஏற்படுகிறது. இதைக் கண்டித்து பொதுமக்கள் பல்வேறு போராட்டங்கள் நடத்தியுள்ளனர்.
இந்தக் குப்பைக் கிடங்கு அருகே ஆயிரத்துக்கும் மேற்பட்ட வீடுகளும், நூற்றுக்கும் மேற்பட்ட வணிக நிறுவனங்களும், 3 திருமண மண்டபங்களும் உள்ளன.
 குப்பைக் கிடங்கில் தீப்பிடித்தால் அதை அணைக்க சுமார் 3 நாள்களாகிறது. மேலும், துர்நாற்றத்துடன் புகை வெளியாவதால் இப்பகுதியில் வசிப்பவர்களுக்கு நுரையீரல் மற்றும் சுவாசம் தொடர்பான பிரச்னைகள் ஏற்படுவதாக புகார் கூறப்படுகிறது. 
எனவே, குப்பைகளைத் தரம் பிரித்து உரம் தயாரிக்கும் கிடங்கு மட்டும் இப்பகுதியில் செயல்பட வேண்டும் எனவும், குப்பை கிடங்கை மக்கள் நடமாட்டம் குறைவாக உள்ள பகுதியில் மாற்றி அமைக்க மாவட்ட நிர்வாகம் நடவடிக்கை எடுக்க வேண்டும் எனவும் பொதுமக்கள் எதிர்பார்க்கின்றனர்.