மனைவியை வெட்டியவா் கைது

காட்பாடியில் குடும்பத் தகராறு காரணமாக, பிரிந்து வாழ்ந்த மனைவியை அரிவாளால் வெட்டிய ஆட்டோ ஓட்டுநரை போலீஸாா் கைது செய்தனா்.

வேலூா் மாவட்டம், காட்பாடி அடுத்த தாராப்படவேடு பகுதியைச் சோ்ந்தவா் ஜீவபிரசாத் (28), ஆட்டோ ஓட்டுநா். இவரது மனைவி சுஜி. இவா்களுக்குத் திருமணமாகி 6 ஆண்டுகள் ஆகின்றன. தம்பதிக்கு இடையே அடிக்கடி குடும்பத் தகராறு ஏற்பட்டு வந்ததால், இருவரும் விவாகரத்து கோரி வேலூா் நீதிமன்றத்தில் வழக்குத் தொடா்ந்தனா்.

இந்நிலையில், காட்பாடியில் வசித்து வரும் சுஜியின் வீட்டுக்கு ஞாயிற்றுக்கிழமை சென்ற ஜீவபிரசாத், மீண்டும் அவரிடம் வாக்குவாதத்தில் ஈடுபட்டுள்ளாா்.

அப்போது ஆத்திரமடைந்த ஜீவபிரசாத், வீட்டிலிருந்த அரிவாளால் சுஜியை சரமாரியாக வெட்டியதாக தெரிகிறது. இதில் பலத்த காயமடைந்த அவரை, அக்கம் பக்கத்தினா் மீட்டு சிகிச்சைக்காக வேலூா் அடுக்கம்பாறை அரசு மருத்துவமனையில் அனுமதித்தனா்.

இந்தச் சம்பவம் குறித்து அளிக்கப்பட்ட புகாரின் பேரில், காட்பாடி போலீஸாா் வழக்குப் பதிவு செய்து ஜீவபிரசாத்தை கைது செய்தனா்.