சுற்றுச்சூழல் விழிப்புணர்வு ஓவியம்: சாதனைப் புத்தகத்தில் இடம் பிடித்த மாணவி

கோவை மாணவி வரைந்த சுற்றுச்சூழல் விழிப்புணர்வு ஓவியம் ஆசிய சாதனைப் புத்தகத்தில் இடம் பிடித்துள்ளது.
கோவை, ராமகிருஷ்ணா பொறியியல் கல்லூரியில் உயிரி மருத்துவம் இரண்டாம் ஆண்டு பயிலும் மாணவி ஆ.தர்ஷினி. இவர், "இயற்கை இந்தியா' எனும் தலைப்பில் சுற்றுச்சூழல் விழிப்புணர்வுக்காக மிகப் பெரிய ஓவியம் வரையும் முயற்சியில் அண்மையில் ஈடுபட்டார்.
சுந்தராபுரத்தில் நடைபெற்ற இந்த முயற்சியில் அவர், 68 அடி நீளமும், 38 அடி அகலமும் கொண்ட மிகப் பெரிய துணியில், 12 மணி நேரத்தில் மிகப் பெரிய ஓவியத்தை வரையத் தொடங்கினார். குறிப்பிட்ட நேரத்துக்கு 80 நிமிடங்கள் முன்னதாகவே ஓவியத்தை வரைந்து முடித்த அவர், சாதனைப் புத்தகத்தில் இடம் பிடித்ததாக அரங்குக்கு வந்திருந்த ஆசிய சாதனைப் புத்தகத்தின் பிரதிநிதி ஜெயகிருஷ்ண சர்மாவால் அறிவிக்கப்பட்டது.
இந்த ஓவியத்தை தர்ஷினி, மஞ்சள், வேப்பிலை, பீட்ரூட், செம்மண், மருதாணி உள்ளிட்ட வண்ணங்களைக் கொடுக்கும் இயற்கைப் பொருள்களைக் கொண்டே வரைந்திருந்தார். மாணவியை ஸ்டேன்ஸ் பள்ளியின் கலை ஆசிரியர் தூரிகை சின்னராஜ், மாவட்ட வனப் பாதுகாவலர் ராமசுப்பிரமணியன், ஓவியர் ஜீவானந்தன் உள்ளிட்டோர் நேரில் சந்தித்து வாழ்த்துத் தெரிவித்தனர்.