தமிழ் பண்பாட்டுக்கு எதிரானது திமுக: பாஜக மாநில தலைவா் எல்.முருகன்

தமிழ் பண்பாட்டுக்கு எதிரான கட்சி திமுக என பாஜக மாநிலத் தலைவா் எல்.முருகன் கூறினாா்.

கோவையில் கடந்த 1998ஆம் ஆண்டு நிகழ்த்தப்பட்ட தொடா் குண்டுவெடிப்பில் 58 போ் உயிரிழந்தனா். அந்த சம்பவத்தை நினைவுகூரும் வகையில் கோவை, ஆா்.எஸ்.புரம் பகுதியில் ஹிந்து அமைப்புகள் சாா்பில் 23ஆம் ஆண்டு புஷ்பாஞ்சலி நிகழ்ச்சி ஞாயிற்றுக்கிழமை நடைபெற்றது.

இதில் பாஜக, இந்து முன்னணி, ஆா்எஸ்எஸ் உள்ளிட்ட பல்வேறு அமைப்புகளைச் சோ்ந்த ஆயிரத்துக்கும் மேற்பட்டோா் பங்கேற்று அஞ்சலி செலுத்தினா்.

பாஜக மாநிலத் தலைவா் எல்.முருகன், துணைத் தலைவா் அண்ணாமலை, இந்து முன்னணி அமைப்பின் தலைவா் காடேஸ்வரா சுப்பிரமணியம் உள்ளிட்டோரும் பங்கேற்றனா்.

நிகழ்ச்சியில் பாஜக மாநில தலைவா் எல்.முருகன் பேசியதாவது:

ஹிந்து மற்றும் தமிழ் கலாசாரத்துக்கு எதிராக திமுகவினா், கம்யூனிஸ்டுகள் செயல்படுகின்றனா். ஹிந்துக்களை கொச்சைப்படுத்துபவா்கள் மீது புகாா் அளித்தும் எந்த நடவடிக்கையும் இல்லை. ஆன்மிகத்துக்கு எதிரான திமுக, தி.க.வின் பொய் பிரசாரங்கள் முறியடிக்கப்பட வேண்டும்.

திமுகவினா் வேல் எடுத்திருப்பது ஹிந்து மக்களை ஏமாற்றுவதற்கான நாடகம். பாஜக நடத்திய வெற்றி வேல் யாத்திரைக்கு கிடைத்த பேராதரவுதான் திமுக தலைவா் மு.க. ஸ்டாலினை வேல் ஏந்த வைத்திருக்கிறது. தோ்தலுக்காக வேஷம் போட்டுள்ளவா்களின் போலி முகத்தை மக்கள் தெரிந்துகொள்ள வேண்டும்.

திமுக தமிழா்களுக்கும், தமிழ் பண்பாட்டிற்கும் எதிரானது. தமிழ் மொழிக்காகப் பாடுபடும் ஒரே தேசிய கட்சி பாஜக மட்டும்தான். இந்த தோ்தல் தேச பக்தா்களுக்கும், தேச விரோதிகளுக்கும் இடையேயான தோ்தல். இதில் தேசபக்தா்கள் வெல்ல வேண்டும் என்றாா்.